پاکستان مقام لری نینگ ایتیشیچه، اوشبو مملکت نینگ اردوسی بیر جواب عملیاتیده، چېگره بۉییده طالبان نینگ بیر نیچه پاسگاهینی یوق قیلگن. بۇ ایش، جنوبی وزیرستان نینگ انگور اده منطقه‌سیده بیر اوی گه هاوان آتشی اصابت قیلیب، بیر نفر ملکی نینگ اۉلیشی و عایله‌سی نینگ باشقه بېش اعضاسی نینگ یره لنیشی آرتیدن یوز بېرگن.
اسوشیتدپرس خبر اېجنسی نینگ معلوماتیگه کۉره، طالبان کوچ لری هاوان آتشی بیلن خیبرپښتونخوا ایالتی نینگ انگور اده منطقه‌سیده گی خلق یشه یدگن جای لر و بازارنی نشانگه آلگن. اوشبو گزارشده کېلتیریلیشیچه، آتلگن مرمیلردن بیری بیر اوی گه توشگن و بازار نینگ بعضی دوکان لری هم ضرر کۉرگن.
خیبرپښتونخوا ایالتی نینگ محلی بیر مقامی، سمر هارون بیلور، سه‌شنبه کونی اکس اجتماعی ترماغیده، بۇ هجوم نینگ منطقه اهالی سی نینگ غضبینی قۉزغتگنینی یازگن. او، امنیتی منبع لرگه اساسلنیب، پاکستان اردوسی بو هجوم گه جواب اوله‌راق طالبان پاسگاه لرینی یوق قیلگنینی قۉشیمچه قیلدی. باشقه بیر محلی مقام هم، چېگره ده جایلشگن پاکستان کوچ لری نینگ بۇ هجوم لرگه «جدی و تأثیرلی شکلده» جواب بېرگنینی ایتگن.
خیبرپښتونخوا والی سی، فیصل کریم کندی، بۇ هجوم نی «طالبان تامانیدن تحریک سیز تجاوز» دیب اتگن و اونی جدی قاره لگن. او، طالبان حکومتی گه خطاب بیر بیانیه‌سیده، اولرنینگ توهم گه توشمسلیگی کېره ک لیگینی و هر قنده‌ی تجاوز گه «بوزولمس اراده بیلن» جواب بېریلیشینی ایتگن.
طالبان حکومتی حاضرگچه بو توقنشوو و پاکستان نینگ پاسگاه لرینی یوق قیلگن لیگی ادعاسی حقیده فکر بیلدیرمه‌گن. ایکی تامان آره سیده آتش المه شووی نینگ سبب نی بۉلگن لیگی هلی معلوم ایمس.
بۇ توقنشوو، سونگگی آی لرده اسلام‌آباد و کابل آره سیده گی تنش لرنینگ کۉپه یگن بیر پیتده یوز بېرماقده. پاکستان کۉپ مرته طالبان حکومتی دن، پاکستان طالبان تحریکی (تی‌تی پی) کبی قوراللی گروه لرگه قرشی، افغانستان توپراغیدن هجوم قیلیش اوچون فایده لنه یاتگنینی ایتیب، حرکت قیلیشنی سوره‌گن. لیکن طالبان بۇ اتهام لرنی رد ایتیب، پاکستان ده گی خوفسیزلیک نی اولکه نینگ ایچکی مسئله سی دیب بیله‌دی.
منبع: اسوشیتدپرس
🌐
