یمن نینگ حوثی لری سه‌شنبه کونی (۵ عقرب) سعودی عربستان نینگ ریاض شهریده گی مدافعه وزیرلیگی و شونینگدیک اوشبو مملکت نینگ شرقیده گی رأس تنوره نفت تصفیه خانه‌سیگه بالستیک موشک بیلن هجوم قیلگنلرینی ادعا قیلدیلر. بۇ ادعا لر منطقه ده گی تنش لرنی آلدینگیدن هم کۉپراق کۉپه یتیرگن.
فرانسه خبر اېجنسی نینگ معلوماتیگه کۉره، حوثی لرنینگ حربی سوزچیسی یحیی سریع، بو گروه نینگ سعودی عربستان مدافعه وزیرلیگینی بیر بالستیک موشک بیلن دقیق نشانگه آلگنینی اعلان قیلدی. او، باشقه بیر پیامده، رأس تنوره نفت تصفیه خانه‌سیگه موشکی هجوم نینگ «کینگ آلاو» گه سبب بۉلگنینی ادعا قیلدی.
بوندن تشقری، حوثی لر نجران هوا میدانی و خمیس مشیط ده گی ملک خالد هوا پایگاهیده ایکی ترانسپورتی اوچاقنی نشانگه آلگنلرینی و بیر پیلوت سیز اوچاقنی هم ابها هوا میدانی تامان آتیلگنلرینی ادعا قیلدیلر.
سعودی عربستان مقام لری حوثی لرنینگ ادعا قیلگن نشان لری حقیده مشخص شکلده فکر بیلدیرمه‌گنلر. شو بیلن بیرگه، اولر ریاض و بیر شرقی ولایت اوزه ره بیر نیچه موشک نی تعقیب ایتیب یوق قیلگنلرینی تصدیقله‌دیلر. ریاض ده گی فرانسه خبر اېجنسی نینگ خبرنگار لری هم شهرده بیر نیچه پارتلش سسینی ایشیتگنلرینی خبر بېرگنلر.
گزارش لرگه کۉره، پارتلش لر سسی ایشیتیلیشی و بنا لرنینگ شیشه لری لرزه گه کېلیشی بیلن بیر پیتده، سعودی دولتی بیر پیام یوباریب خلق دن پناهگاه لرگه باریشنی ایسته‌گن. سعودی مقام لری ریاض تامان آتیلگن ایکی بالستیک موشک نینگ اوریب توشیریلگنی و اولرنینگ پارچه‌لری نینگ بیر بنا و بیر موترگه توشگنینی اعلان قیلدیلر.
سعودی رهبرلیگیده گی حربی ائتلاف هم، حوثی لرنینگ سعودی عربستان نینگ شرقی ولایتی تامان آتیلگن اوچ موشکی نینگ تعقیب ایتیب یوق قیلینگنینی اعلان قیلدی. بۇ هجوم لر، سونگگی هفته لرده گی تنش لرنینگ کۉپه یشی نینگ دوامیده یوز بېرماقده که او پیتده حوثی لر سعودی عربستان نینگ نفتی تأسیسات لری و هوا میدان لریگه هجوم لرینی کۉپه یتیرگنلر.
منبع: فرانسه خبر اېجنسی
🌐
