د دیموکرات ګوند نوماند، عبدل سید، د امریکا په منځمهاله ټاکنو کې د میشیګان په ایالت کې خپل جمهوري غوښتونکي سیال ته ماتې ورکړه او د متحده ایالاتو په تاریخ کې د لومړني مسلمان سناتور په توګه وټاکل شو. دا بریا د «ډیسیشن ډیسک ایچ کیو» په نوم د ټاکنیزو معلوماتو د تحلیل مرکز له خوا اعلان شوه.
ښاغلي سید د جمهوري غوښتونکي نوماند مایک راجرز ته په ماتې ورکولو سره وتوانید چې د سنا دا مهمه څوکۍ د دیموکراتانو لپاره وساتي. هغه د بریا له اعلان وروسته، د خپلو ملاتړو په منځ کې حاضر شو او له هغوی څخه د مننې ترڅنګ یې وویل چې د میشیګان خلکو ته د خدمت لپاره "بې صبره دی".
هغه په خپله وینا کې، پر جمهوري غوښتونکو تور ولګاوه چې د ټاکنیز کمپاین په ترڅ کې یې هڅه کړې چې د هغه پر نوم او مذهبي عقایدو په برید کولو سره د خلکو ترمنځ نفاق رامنځته کړي. عبدل سید وویل: «موږ ټول پوهیږو چې زما نوم او مذهب د دې لامل نه دی چې تاسو د تیلو یا خوراکي توکو د اخیستلو توان نه لرئ او ډاکټر ته نه شئ تللی.»
دا بریا په امریکا کې د مسلمانانو ټولنې لپاره یو تاریخي عطف ګڼل کیږي او د دې هېواد په لوړو سیاسي کچو کې د تنوع زیاتوالی په ګوته کوي. د هغه ټاکنه د مدني ډلو او د بشري حقونو د فعالانو له خوا په پراخه کچه هرکلۍ شوې ده.
د سیاسي پلوه، عبدل سید په دیموکرات ګوند کې یوه پرمختللې څېره پېژندل کیږي. هغه له دې وړاندې په غزه کې د اسرائیل جګړه "نسل وژنه" بللې وه او همدارنګه یې د ایران پر وړاندې له هر ډول پوځي اقدام سره مخالفت کړی دی. دغه دریځونه یې تر یوه حده د دیموکرات ګوند له اصلي بهیر څخه بېلوي.
د امریکا سنا ته د هغه ټاکل کیدل کیدای شي د متحده ایالاتو د بهرنۍ پالیسۍ په ځانګړې توګه د منځني ختیځ په اړه په بحثونو اغېز ولري. په هرصورت، هغه اوس د میشیګان ایالت د ټولو خلکو د استازیتوب له ننګونې سره مخ دی چې بېلابېل سیاسي نظرونه لري.
سرچینه: ډیسیشن ډیسک ایچ کیو
🌐
