هند سینما تاریخی نینگ اینگ قمّت پروژه‌سی حسابلنگن «رامایانا» حماسی فلمی نینگ بیرینچی قسمی ۵۰۰ میلیون دالر بودجه بیلن دنیا بویلب سینمالرده نمایشگه قوییلدی. فلم نینگ ایجادرکارلری اوشبو اثارنی هالیوود فلملری بیلن رقابت قیله آله‌دیگن سویه‌گه آلیب چیقیشنی مقصد قیلگن.
نیتیش تیواری تمانیدن رژیسورلیک قیلینگن «رامایانا: بیر افسانه‌نینگ ظهوری» ناملنگن فلمده هند مشهور اکتېرلری، هالیوود نینگ محیر بصری جلولر بویینچه متخصص‌لری و اوسکار مکافاتی ساورینداری ایکّی کمپوزیتور اشتراک اېتگن. فلم نینگ ایکّینچی قسمی کېلگوسی ییلده سینمالرگه چیقاریلیشی رژه‌لشتیریلگن.
ددلاین نشریه‌سی نینگ معلوماتیگه کۉره، فلم بیرینچی هفته آخریده دنیاده ۵۵ میلیون دالردن آرتیق ساتیلیش کۉرستدی و بوندن ۱۲.۲ میلیون دالری امریکا قۉشمه ایالتلری سینمالریگه تېگیشلی بۉلدی. بو نمایش هندو دینی نینگ دیوالی بیرامی کونلریده عملگه آشدی.
اوشبو اثرده راما نقشی رنبیر کپور، سیتا نقشی سای پالوی و راوانا نقشی جنوبی هند سینماسی یولدوزی یاش تمانیدن ایجرا اېتیلگن. دی‌نگ شرکتی نینگ باشلیغی و فلم پروډیوسری نامیت ملوترا، برچه سرمایه‌نی شخسن اۉزی تامنله‌گنینی و مالیوی خطرنی قبول قیلگنینی معلوم قیلدی.
فلم موسیقیسی اې‌آر رحمان بیلن هانس زیمر همکارلیگیده یره‌تیلگن. بیراق تنقیدچیلر مختلف فکرلر بیلدیرماقده؛ گاردین نشریه‌سیدن پیتر بردشا و هندوستان تایمز تنقیدچیسی ریشاب سوری کۉریش جلوه‌لرینی ماقته‌گن بۉلسه‌لر، ان‌دی‌تی‌وی تنقیدچیسی سایبال چترجی داستان نینگ سستلیگی و آی‌جی‌ان تنقیدچیسی سیدانت ادلکا کمپیوتر گرافیکاسی حقیده تنقیدی فکرلر یازگن.
فلم نینگ انګلیسچه قسمیده آوازلرنی حرکتلنتریش اوچون سونی عقلدن فایده‌لنیلگنی بحث‌لرگه سبب بۉلدی. هر بیر قسم اوچون اورته‌چه ۲۵۰ میلیون دالر مصرفلنگنی سببلی، بو اثر نینگ اقتصادی فایده‌سی دنیا بویلب کۉپراق تاماشابینلرنی جلب قیلیشگه باغلیق بۉلیب قالماقده.
منبع: ددلاین
🌐
