کابل یشاووچیلریدن بیر قنچه‌سی طالبان حکومتی استخباراتی و امر بالمعروف محتسبلری تامانیدن عیاللرنی قیسووگه آلیش و تحقیرلش کوچه‌یگنیدن شکایت قیلیب، بو عمللر قیزلر نینگ اویگه قمیلیب قالیشیگه سبب بۉلگنینی معلوم قیلدی. یشاووچیلر نینگ باوریچه، بو سیاستلر عیاللرنی تدریجی شکلده جمعیتدن چیقاریش مقسدیگه قره‌تیلگن.
کابلده ایشلاوچی قیزلردن زینب نینگ ایتیشیچه، طالبان کوچلری او مینگن تکسی موترلرنی مکرر توخته‌تیب، هیداوچی بیلن عیاللر نینگ مناسبتلری حقیده ناتۉغری سوراقلر بېرگن و حتی اولر نینگ تیلیفونلرینی تېکشیریب، قورقیتگن.
رویا اسملیک باشقه بیر قیز نینگ بیلدیریشیچه، موترسایکل مینگن طالبان منسوبلری اولرنی اویگه ایلتیب قۉیماقچی بۉلگن تکسیچینی کلتکله‌ب، ناملوم تامانگه آلیب کېتگن. اونینگ اورغولشیچه، بو قورقوو محیطی عیاللرنی ایش و فعالیتدن توسیش اوچون اویوشتیریلماقده.
شونینگدیک، باشقه بیر یشاووچی احمد نینگ معلوم قیلیشیچه، اونینگ توغیشقانی اۉز عیال همکارینی موترده ایشگه آلیب بارگنی سببلی طالبان تامانیدن اوچ کېچه-کوندوز توقیفده سقلنیب، پول و ضمانت بېریلگندن سۉنگ قۉیبتامان بۉلگن. تکسیچیلر هم عیال مسافرلرنی تاشیشلری اوچون کوندوزلری کۉپ مراتبه سوراق-جواب بۉلیشلرینی ایتگن.
بو وضعیت خلق‌ارا عفو تشکیلاتی نینگ استرالیاده «افغانستانده‌گی عیاللر و قیزلر اوچون عدالت» ناملی کمپاین باشله‌گنی بیلن بیر وقتده اورته‌گه چیقماقده. مذکور تشکیلات افغانستانده عیاللر وضعیتی دنیا بۉییچه اینگ آغیر حقوقی بحرانلردن بیری ایکنینی کۉرسه‌تگن.
خلق‌ارا عفو تشکیلاتی بو حرکتلرنی تصادفی ایمس، بلکیم عیاللر و قیزلرنی برچه جمعیت میدانلریدن یۉق قیلیش مقصدیده قۉللنیله‌یاتگن سیستماتیک سیاست دیب بهاله‌گن.
منبع: هشت صبح
🌐
