په کابل کې د ایران سفارت اعلان کړی چې د طالبانو له چارواکو سره یې د سرحدي همکاریو په اړه تازه خبرې کړې دي. په خبرپاڼه کې راغلي چې دواړو لوریو د ګډو پولې پر امنیت او د قاچاق پر مخنیوي ټینګار کړی او دا یې د اړیکو مهم ټکی بللی دی.
تر دې وړاندې هم د ایران سفیر او د طالبانو د سرحدونو وزیر نورالله نوري په وږې میاشت کې په ورته موضوعاتو خبرې کړې وې. ایران ژمنه کړې چې له افغان لوري سره به دوامداره همکاري ولري ترڅو په پولو کې ستونزې هوارې شي.
په دې لیدنو کې د سوداګرۍ، ټرانزیټ او د غیرقانوني تګ راتګ د مخنیوي په اړه هم بحثونه شوي دي. دا خبرې په داسې حال کې کیږي چې د دواړو هیوادونو ترمنځ اوږده پوله وخت ناوخت د نښتو او ستونزو شاهده وي.
د سرحدي امنیت لپاره د ایران او طالبانو تازه هوکړه
