د اوکراین ولسمشر ولادیمیر زلنسکي ویلي، داسې احساسوي چې هېواد یې د امریکا متحده ایالاتو له لوري د حیاتي ملاتړ د له لاسه ورکولو په حال کې دی.
فرانس پریس خبري اژانس د چهارشنبې په شپه، د اکتوبر په ۱۴مه، راپور ورکړ چې ښاغلي زلنسکي دا څرګندونې بریتانیا ته د خپل سفر پر مهال کړې دي. هغه په خپل هېواد کې د جګړې په اړه د واشنګټن د سیاستونو د بدلون په اړه خپله اندېښنه څرګنده کړه.
د راپور له مخې، زلنسکي د امریکا د ولسمشر ډونالډ ټرمپ له لوري له روسیې سره د "انرژۍ اوربند" او د ډیزلو د سونګ توکو تړون ته په اشارې سره وویل چې د "خیانت" احساس کوي. خو هغه ټینګار وکړ چې اوکراین لاهم له متحده ایالاتو سره پر خپل ستراتیژیک ملګرتیا حساب کوي.
د اوکراین ولسمشر د ښاغلي ټرمپ پر وروستیو سیاستونو نیوکه وکړه او ویې ویل: "فکر کوم سلاکاران یې په غلطۍ کې دي. نه پوهېږم څوک هغه غلط لوري ته بیايي… دا د تاریخ سمه لاره نه ده."
دا څرګندونې په داسې حال کې کېږي چې ډونالډ ټرمپ په دې وروستیو کې پر اوکراین غږ کړی چې د روسیې پر نفتي تاسیساتو خپل بریدونه ودروي، یو داسې اقدام چې د جګړې په وړاندې د امریکا په چلند کې د بدلون نښه ګڼل کېږي.
په ۲۰۲۲ کال کې پر اوکراین د روسیې له بشپړ یرغل راهیسې، متحده ایالات د کییف تر ټولو لوی پوځي او مالي ملاتړی دی. د امریکا په ملاتړ کې هر ډول د پام وړ کمښت کولی شي د اوکراین پر دفاعي وړتیاوو جدي اغېز وکړي او د جګړې مسیر بدل کړي، دا هغه موضوع ده چې د اوکراین اروپايي متحدین یې هم اندېښمن کړي دي.
سرچینه: Agence France-Presse
🌐
