د کابل د قصبه سیمې یو شمېر اوسیدونکي وايي چې د طالبانو د ملي پراختیا شرکت مامورینو د یکشنبې په ورځ، د لړم په دریمه، شاوخوا ۲۰ کورنۍ د استوګنې له څلورو بلاکونو لاندې زیرمو څخه ایستلې دي.
د دغو کورنیو په وینا، دوی د کلونو راهیسې د بلاکونو د اوسیدونکو او د کور جوړولو دولتي شرکت په هوکړه په دغو زیرمو کې ژوند کاوه او د کور د کرایې ورکولو توان نه لري.
په دغو زیرمو کې یوې مېشتې ښځې وویل، کورنۍ یې د خپل خاوند د معلولیت او د نفقې ګټونکي د نشتوالي له امله حتی د خپلو توکو د لېږدولو توان هم نه لري.
دا کورنۍ وايي چې د ایستلو پر مهال ورته د ژوند کولو لپاره کوم بل ځای نه دی ورکړل شوی. دا پیښه په داسې حال کې رامنځته کیږي چې د طالبانو د ښارجوړونې وزارت اعلان کړی چې په کابل کې د شیخ زاید ښارګوټي د ۵۲۱ اپارتمانونو د بېرته اخیستلو بهیر وروستی شوی دی.
دغه وزارت هغو څښتنانو ته چې خپل قسطونه یې نه دي ورکړي، خبرداری ورکړی و چې خپل اپارتمانونه خالي کړي. دا اقدامات د دولتي ملکیتونو په اړه د طالبانو سخت دریځه پالیسي په ګوته کوي، خو په ورته وخت کې د بې وزلو او زیان منونکو کورنیو لپاره جدي ستونزې رامنځته کوي.
سرچینه: د کابل د قصبه اوسیدونکي
🌐
