روسیه جمهور رئیسی نینگ افغانستان ایشلری بۉییچه مخصوص نماینده سی ضمیر کابلوف، طالبان حکومتی و پاکستان آره سیده گی کشکینلیک لرنینگ شدت لنیشی، ۵ اکتوبر (۱۴ میزان) ده اۉتکزیله دیگن مسکو مصلحت ییغیلیشی نینگ کۉن ترتیبیگه کیریتیلگنینی اعلان قیلدی.
جناب کابلوف نینگ ایتیشیچه، روسیه مسکو ییغیلیشی نینگ زمینه سیدن تامان لرنینگ «منطقی کیلیشوولر» گه اېریشیشیگه یاردم بیریش اوچون فایده لنیشنی نیت قیلماقده. او، طالبان نینگ تشقی ایشلر وزیری امیرخان متقی و پاکستان نینگ افغانستان ایشلری بۉییچه مخصوص نماینده سی نینگ بو ییغیلیشده قتنه شیشینی تأییدله دی.
ضمیر کابلوف ایزوستیا روزنامه سی بیلن صحبتده ایتدی: «روسیه اگر مسکو نینگ جایگاهیدن فایده لنیب، پاکستان و طالبان نی منطقی کیلیشوولر تامانیگه یۉنلتیره آلسه، خرسند بۉله دی.»
او، حاضرده هر ایکّی تامان نینگ اۉز موضع لریده تاکیدله یاتگنی نی قۉشیمچه قیلدی؛ پاکستان افغانستان توپراغیده پاکستان طالبان تحریکی (تی‌تی پی) گه پناه بیریشنی توختتیشنی طلب قیلماقده، حال بوکه طالبان مقام لری بو اتهامنی رد ایتیب، حربی لرنینگ اسلام‌آباد بیلن توقنه شووینی پاکستان نینگ بیر ایچکی مسئله سی دیب بیله دیلر.
روسیه تشقی ایشلر وزیرلیگی نینگ سۉزچیسی ماریا زاخارووا، آلدینراق مسکو فارمتی نینگ سکّیزینچی ییغیلیشی افغانستان، هند، ایران، قزاقستان، چین، قرغزستان، پاکستان، تاجیکستان، اۉزبېکستان و روسیه کبی مملکت لرنینگ مخصوص نماینده لری و یوکسک مرتبه لی مقام لری سویه سیده اۉتکزیله جکینی اعلان قیلگن اېدی.
بو ییغیلیشده بلاروس و مصر هیئت لری هم مېهمان صفیده اشتراک ایته دی و روسیه تشقی ایشلر وزیری سرگئی لاوروف آچیلیش نطقینی ایراد ایته دی. مسکو فارمتی ییغیلیشی افغانستان بیلن سیاسی و اقتصادی تعامل لر و تروریزم گه قرشی کوره‌شده منطقوی همکارلیک لرنی کوچه‌یتیریشگه تمرکز قیلگن.
منبع: ایزوستیا روزنامه سی
🌐
