بیرلشگن ملت لر تشکیلاتی، خلق ارا اۉقیتووچیلر کونی، ۵ اکتوبر، مناسبتی بیلن افغان اۉقیتووچیلری نینگ «شوق، بیلیم و تعهدی» اوچون منتدارچیلیک بیلدیررکن، افغان خاتین قیزلری اۉرگنیشنی دوام اېتتیریب، کېله جک نسل نی اۉقیتیشده رول اوینه شیگه امید بیلدیردی. بو تشکیلات افغانستانده قیزلر و خاتینلر اوچون اۉرته و عالی تعلیم حقی نی قیته تیکلشنی طلب قیلدی.
بیرلشگن ملت لر باله‌لر بنیادی (یونیسف) دوشنبه کونی بیر بیانیه ده، افغانستانده یاش قیزلر اۉرته تعلیم و بو دور نینگ اولر نینگ کېله جگی اوچون تامینله یدیگن فرصتلریدن محروم قیلینگنینی ایتدی. بو نهاد، بو محرومیتگه قره‌مسدن، افغان قیزلری هلی هم اۉز آرزولرینی تعقیب اېتیب تورگنلرینی و «قیزلرنینگ اۉرته و عالی تعلیم حقی قیته تیکلنیشی کېره ک» لیگینی تاکیدله‌دی.
یونیسف بیانیه‌سیده ایتیلیشیچه، افغانستان بیر تاماندن متخصص خاتینلر کمچیلیگی بیلن روپه‌رو بولیب، باشقه تاماندن، قیزلر تعلیمی نینگ منع ایتیلیشی، بو خاتینلرنینگ اورنینی ایگه لله شی کیره ک بولگن کیله جک نسل نی تعلیم فرصتیدن محروم قیلماقده. بو ممنوعیت ۲۰۲۱ نچی ییل سپتامبر (سنبله ۱۴۰۰) دن باشلب آلتینچی صنفدن یوقاری مکتبلر اوچون و ۲۰۲۲ نچی ییل دسامبر (قوس ۱۴۰۱) دن بیلیم یورتلری اوچون عملی بولگن.
افغانستانده بیرلشگن ملت لر یاردمچی هیئتی (یوناما) هم افغان اۉقیتووچیلری، خصوصاً قیین شرایطده و چیگره‌لنگن منبعلر بیلن قشلاقلرده فعالیت قیله‌یاتگن معلملردن منتدارچیلیک بیلدیردی. یوناما، حاضرگی کونده مصنوعی ذکاوت و یالغان معلوماتلر تأثیری آستیده بولگن دنیاده، اۉقیتووچیلرنینگ رولی هر قچانگی دن کۉره مهمراق ایکنینی قۉشیمچه قیلدی.
بیرلشگن ملت لرنینگ بهالشیگه کۉره، اگر قیزلر تعلیمیگه قوییلگن ممنوعیت ۲۰۳۰ نچی ییلگچه دوام ایتسه، باشلنغیچ دوردن کیینگی تعلیمدن محروم بولگن قیزلر سانی تۉرت میلیون نفردن آشیب کیته‌دی. یونسکو آلدینراق، اوتگن بیش ییل ایچیده و طالبان نینگ قدرتگه قیتیب کیلیشی آرتیدن ایکی میلیون دن آرتیق قیز تحصیل نی دوام اېتتیریشدن محروم بولگنینی اعلان قیلگندی.
یونیسف بو چیگره لشلرنینگ دوامی، افغانستان نینگ کیله جک نسل متخصص خاتینلرنی تربیه لش قابیلیتینی کمه یتیریشی حقیده آگاهلنتیرگن. بو نهاد نینگ تخمینیگه کۉره، افغانستان ۲۰۳۰ نچی ییلگچه تخمیناً ۲۰ مینگ خاتین اۉقیتووچی و ساغلیق نی سقلش بۉلیمیده ۵۴۰۰ خاتین خادم کمچیلیگی بیلن یوزله شیشی ممکن.
بیرلشگن ملت لرنینگ تعلیم، علم و مدنیت تشکیلاتی (یونسکو) که ۱۹۹۴ نچی ییلده ۵ اکتوبرنی خلق ارا اۉقیتووچیلر کونی دیب بلگیله‌گن، بوتون دنیا بویلب اۉقیتووچیلرنی قوللب قوتلش و اولرنینگ کسبی جایگاهینی یخشی لشنی تاکیدله‌دی. بو تشکیلات اۉقیتووچیلر دیجیتال تکنالوژیلر، اقلیم اۉزگریشلری و مهاجرت کبی قیینچیلیکلر بیلن روپه‌رو ایکنلرینی و اۉز روللرینی یخشیراق بجریش اوچون کۉپراق حمایت و مناسب ایش شرایطیگه محتاج ایکنلرینی ایتدی.
منبع: بیرلشگن ملت لر تشکیلاتی
🌐
