خلق ارا جنایی محکمه سی، طالبان حکومتی نینگ معارف وزیری حبیب الله آغا و عالی تحصیلات وزیری ندا محمد ندیم نی توتیش بویروغلرینی آشکار قیلگنینی اعلان قیلدی. ۱۴۰۴ نچی ییل سنبله آیی نینگ ۱۸ نچی کونیده (۲۰۲۵ نچی ییل ۹ سپتامبر) صادر اېتیلگن بو بویروقلر، انسانیتکه قرشی جنایت، خصوصاً عیال و قیزلرگه قرشی جنسیت اساسیده گی اذیت و آزارلر عیبلاوی بیلن شو پیتگچه محرمانه قالگن اېدی.
محکمه نینگ اعلامیه سیگه کۉره، بو قرار قاضیلرنینگ طالبان نینگ بو ایکّی مقامی عیال و قیزلرنینگ اساسی حقوقلرینی کینگ کۉلمده پامال قیلگن سیاستلرنی امر قیلیش، تشویق اېتیش یاکه اجرا قیلیشده رول اۉینه گنلیگیگه ایشانیش اوچون یېترلی دلیللر تاپگنیدن سۉنگ قبول قیلینگن. بو حرکتلر آلتینچی صنفتن یوقاری قیزلرنی تعلیم آلیشدن محروم قیلیش و عیاللرنی عالی اۉقوو یورتلریده تحصیل کۉریشدن منع قیلیشنی اۉز ایچیگه آلگن.
بو ایکّی بویروق، آلدین ۱۴۰۴ نچی ییل سرطان آیی نینگ ۱۷ نچی کونیده طالبان رهبری هبت الله آخندزاده و اوشبو گروه نینگ عالی محکمه سی رئیسی عبدالحکیم حقانی اوچون صادر اېتیلگن توتیش بویروغلریگه قۉشیله دی. اوشبو بویروقلرنینگ هم تفصیلاستی محرمانه قالماقده. خلق ارا جنایی محکمه سی تۉرتله مقامنی عیال و قیزلرنی سیستملی شکلده باستیرگنلیکده گی روللری سبب، انسانیتکه قرشی جنایت حسابلنیشی ممکن بولگن لیگی اوچون تعقیب آستیگه آلگن.
ینگی نشر اېتیلگن حجت لرده ایتیلیشیچه، طالبان نینگ سیاستلری فقط عیال و قیزلرنی اېمس، بلکه اولرنینگ حقوقلرینی مدافعه قیلگن کیشیلرنی هم نشانگه آلگن. محکمه نینگ ایتیشیچه، طالبان تامانیدن «عیال و قیزلرنینگ حامی لری» یاکه سیاسی مخالف دیب تانیلگن کیشیلر باستیروو و اذیتگه دوچار بولگنلر.
۱۴۰۰ نچی ییل اسد آییدن باشلب طالبان نینگ قدرتگه قیتیشی بیلن، اوشبو گروه عیاللرنینگ حقوق و اېرکینلیکلریگه جدی چیکلاولر قۉیگن. بو چیکلاولر کۉپلب بخشلرده تعلیم و ایش منعیتی، شونینگدېک یوریش توریش، عامه جایلرده قتنشیش و بیان اېرکینلیگی بوییچه چیکلاولرنی اۉز ایچیگه آلگن.
بیرلشگن ملت لر تشکیلاتی نینگ معلوماتیگه کۉره، افغانستان دنیا ده گی یگانه مملکت دیر که او ییرده قیزلر آلتینچی صنفتن یوقاری مکتبگه باریشگه رخصت اېتیلمه یدی. طالبان نینگ بو اقداملری خلق ارا کینگ عکس العمللر بیلن دوچ کېلگن و کۉپچیلیک بونی جنسیتی اپارتاید نینگ مصداقی دیب آتگنلر.
خلق ارا جنایی محکمه سی عیبلنووچیلرنی توتیش اوچون اۉز پولیس کوچلریگه اېگه اېمس و اۉز بویروغلرینی اجرا قیلیش اوچون اعضا مملکتلرنینگ همکارلیگیگه تیه
نه دی. طالبان نینگ تۉرتله مقامی نینگ افغانستانده یشه یاتگنینی و اوشبو گروه مملکت نینگ کنترولینی اۉز قۉلیده توتیب تورگنینی نظگه آلگنده، حاضرگی شرایطده بو بویروقلرنینگ اجرا اېتیلیشی جدی قیینچیلیکلر بیلن یوزمه یوز دیر.
منبع: خلق ارا جنایی محکمه سی نینگ حجت لری
🌐
