افغانستان ملی مقاومت جبهه سی، اخیرگی شایعه لرگه جواب قیته ریب، داعش گروهی بیلن هر قنده ی علاقه سی بارلیگینی قاطعیت بیلن رد ایتدی و بو گروه نینگ فعالیت لرینی قاره له دی. بو جبهه، مذکور اتهام لرنی اوزیگه قرشی «تبلیغاتی کمپاین و شایعه پراکنلیک» نینگ بیر قسمی دېب اته گن.
جبهه تامانیدن نشر قیلینگن بیر بیانیه ده، طالبان و داعش «بیر سکه نینگ ایککی تامانی» دېب ایتیلگن و هر ایککله سی نینگ بیر ایدئولوژیک منبع دن آذیقلنیشی بیلدیریلگن. مقاومت جبهه سی تأکیدلشیچه، بو ایککی ترورچی گروه آره سیده گی رقابت، عقیده وی تفاوت لردن کۉره، قدرت، نفوذ و مالی منبع لر اوستیده دیر.
مقاومت جبهه سی نینگ ایشانچیگه کۉره، طالبان حکومتی اۉز سیاسی و حربی مخالف لرینی بدنام قیلیش مقصدی بیلن، داعش کبی افراطی گروه لرنینگ فعالیت لرینی اولرگه نسبت بېریشگه اورونماقده. بو جبهه نینگ ایتیشیچه، طالبان «دشمن یسه ش» و بیر ساختگی تهدید یره تیش آرقه لی، مخالف لرنی باستریشنی توجیه قیلیش و حکومتچی لیکده گی اۉز کَمی لیک لریدن خلق فکرینی چالغیتیش نیتیده دیر.
۲۰۲۱ نچی ییل نینگ اگست آیی ده کابل طالبان تامانیدن اېگللنگنیدن سۉنگ تشکیل تاپگن ملی مقاومت جبهه سی، اساساً افغانستان نینگ سابق حکومت امنیتی کوچلری و طالبان مخالف لریدن عبارت. احمد مسعود رهبرلیگیده گی بو جبهه، طالبان حکومتی گه قرشی قوراللی و سیاسی کوره شینی دوام ایتتیرماقده.
بو بیانیه شونده ی بیر پَیتده بیریلگن که، اخیرگی آیلرده اجتماعی ترماق لرده بعضی بیر تصدیقلنمه گن گزارش لرده، طالبان نینگ بعضی مخالف گروه لری و داعش آره سیده گی همکارلیک حقیده ادعا لر مطرح قیلینگن اېدی. مقاومت جبهه سی بو ادعا لرنی اساس سیز دېب، افراطیت نینگ هر بیر شکلی گه قرشی کوره شیش بوییچه اۉز تعهدینی تأکیدله دی.
ملی مقاومت جبهه سی بیانیه سی نینگ سۉنگگیده، اۉز مقصدی نینگ افغانستان ده خلق اراده سیگه اساسلنگن بیر دموکراتیک نظام یره تیش ایکن لیگینی و طالبان نینگ مقصدلریگه اۉخشش مقصد لرگه اېگه بولگن گروه لر بیلن اصلا همکارلیک قیلمسلیکلرینی تکراراً بیلدیردی.
منبع: Zarin TV
🌐
