کابل نینگ غربیده جایله شگن خاتم الانبیاء مدنی و مذهبی مجتمع سی نینگ مسئولی حسن فاضل‌زاده، طالبان تامانیدن قولگه آلینگنیدن سۉنگ، بو گروه نینگ عدلیه وزیرلیگی نینگ مذکور مرکز حقیده گی قراریدن «تولیق راضی» ایکنینی اعلان قیلدی. بو بیانات، منبع لرنینگ ایتیشیچه، او بو رضایت نی بیلدریشگه مجبور قیلینگن بیر پَیتده بیریلماقده.
طالبان عدلیه وزیرلیگی نینگ مامورلری سنبله آیی نینگ آخرلریده بو بویوک شیعه مرکزیگه یوریش قیلیب، اونی یاپیب و جناب فاضل‌زاده نی قولگه آلگن اېدیلر. قوییب یوباریلگنیدن سۉنگ، او طالبان نینگ اقوام و قبایل وزیری نورالله نوری بیلن بیرگه غزنی ولایتی نینگ جاغوری ولسوالی سیگه سفر قیلدی و اوشبو سۉزلرنی او یېرده بیان ایتدی.
جناب فاضل‌زاده جاغوریده گی بیر مراسمده ایتدی: «عدلیه وزیرلیگی نینگ توضیحات و تیکشیرولریدن تولیق راضی من و فیصله نی عادلانه و تأیید ایتیلرلیک دېب بیله من.» او شونینگدیک طالبان نینگ عدلیه وزیری عبدالحکیم شرعی نینگ یانداشوینی «جانکویر و ایشانچ بخش» دېب توصیفله دی.
بو شیعه روحانی قۉшимچه قیلدی که، «بعضی مغرض جریانلر و حلقه لر» بو مجتمع نینگ وضعیتی نی حقیقت گه قرشی کۉرستگنلر. شونگه قره می، بو موضوع گه یقین منبع لر ایشانیشیچه، بو بیانات باسیم آستیده و طالبان نینگ بو مذهبی مرکزنی تارتیب آلیشینی توجیه قیلیش اوچون مجبوراً آلینگن.
مسجد، کتابخانه و تعلیم مرکز لریدن عبارت بولگن خاتم الانبیاء مجتمعی، کابلده گی شیعه لرنینگ اینگ مهم مدنی و مذهبی مرکز لریدن بیری سنله دی. بو مجموعه سابق شیعه رهبرلریدن بولمیش آیت‌الله فاضل گه تیگیشلی اېدی و اونینگ وفاتیدن سۉنگ، اۉغلی سید حسن فاضل‌زاده اونینگ مدیریتی نی اۉز ذمه سیگه آلگن.
جناب فاضل‌زاده نینگ بیر طالبان وزیری یانیده بولیشی و بیر مدت توقیفدن سۉنگ رضایت بیلدریشی، مذهبی رهبرلرنینگ مستقل لیگی و خوفسیزلیگی و شونینگدیک طالبان حکومتی آستیده گی آزچیلیک لرنینگ مدنی-مذهبی مرکز لری نینگ تقدیری حقیده جدی سۉراقلر و تشویش لرنی یره تگن.
منبع: Zarin TV
🌐
