ترکیه مهاجرت اداره سی نینگ ینگی معلوماتلریگه کۉره، بو مملکت پولیسی جاری میلادی ییل نینگ بیرینچی تۉققیز آییده ۲۹ مینگ و ۷۱۲ نفر افغان پناهجوی نی قولگه آلگن. بو آمارلر افغان لر نینگ ترکیه ده قولگه آلینگن پناهجوی لر رویخطی نینگ باشیده تورگنینی کۉرستماقده.
ترکیه مهاجرت اداره سی اۉز گزارشی ده اعلان قیلدی که، بو مدت ایچیده مملکت بۉیلب تورلی مملکت لردن تقریباً ۱۱۰ مینگ نفر سَنَدسیز پناهجوی قولگه آلینگن. بو پناهجوی لر اعتبارلی اقامت سندلری بۉلمگنی اوچون قولگه آلینگنلر.
افغانستان تبعه لریدن کیین، سوریه، اۉزبېکستان، ترکمنستان، ایران، مراکش، عراق، مصر، سودان و یمن تبعه لری قولگه آلینگنلرنینگ اِنگ کۉپ سانی نی تشکیل ایتماقده. بو آمارلر ترکیه ده پناهجوی لرگه نسبتأ باсим نینگ آشگنینی کۉرستماقده.
ترکیه مهاجرت اداره سی اۉز گزارشی ده قولگه آلینگن کیشی لرنینگ تقدیری و مملکتدن چیقریلگن کیشی لرنینگ انیق سانی حقیده تفصیلات بیرمه‌گن. شونده ی بۉلسه-ده، انسان حقوقلری تشکیلاتلری هر دایم ترکیه دن افغان پناهجوی لرنینگ مجبوراً چیقریلیشیدن خواطر بیلدیرگنلر.
شونینگدیک، بو گزارشده اشاره قیلینگن که، ییل نینگ بیرینچی تۉققیز آییده ۱۰ مینگ و ۱۳۵ کیشی انسان قاچاقی عیبلاوی بیلن قولگه آلینگن. بو موضوع، ترکیه گه مهاجرت یۉل لریده انسان قاچاقی شبکه‌لری نینگ کینگ فعالیتینی کۉرستماقده.
ترکیه پولیسی و ساحل قۉریقچی لری دواملی روشده، کۉپینچه افغانستان تبعه لری بۉلگن پناهجوی لرنی قولگه آلیش اوچون عملیات لر اویوشتیرماقده لر. بو کیشی لرنینگ کۉپچیلیکی قولگه آلینگندن سۉنگ افغانستان گه قیتر یوباریلیش خطری بیلن روپه‌رو بۉلماقده لر.
منبع: Zarin TV
🌐
