افغانستان آزادلیک جبهه سی، بدخشان ولایتی نینگ مرکزی فیض آباد شهریده یوز بیرگن بیر پارتلش مسئولیتینی اۉز بوینیگه آلیب، بیر قومانداننی اۉز ایچیگه آلگن تۉرت طالبان اعضاسینی اۉلدیرگنینی ادعا قیلدی. اوشبو جبهه چهارشنبه کونی، بو هجوم نینگ بیر هایلکس نوعلی موترگه قرشی «هدفلی عملیات» بۉلگنینی اعلان قیلدی.
آزادلیک جبهه سی نینگ بیاناتیده، اۉلدیریلگن طالبان قوماندانی نینگ بیر مدت بو جبهه کوچلری تعقیبیده بۉلگنی، لیکن اونینگ اسمی ذکر ایتیلمگنی کیلتیریلگن. بو جبهه شونینگدیک، طالبان نی بو هجومدن کیین، سراسیمه لیک بیلن تینچ اهالی نی قولگه آلیش و آزار بېریشگه باش اورگنلیکده و قۉرقینچ و وحشت فضاسینی یره تگنلیکده عیبله‌دی.
بو ادعالر شونده‌ی بیر حالده مطرح بۉلماقده که، طالبان رسمی لری بو واقعه حقیده فرقلی بیر روایت تقدیم ایتماقده. بدخشانده گی طالبان پولیس قوماندانلیگی سۉزچیسی دفتری، پارتلش نینگ بیر گلدان ایچیگه جایلشتیریلگن پارتلاووچی ماده‌لردن قاینقلنگنینی تأییدله‌گن، لیکن اونینگ هدفی بیر کرولا نوعلی موتر بۉلگنینی و نتیجه‌ده ایکّی تینچ اهالی نینگ یینگیل یره لنگنینی ایتگن.
قولگه آلیشلر خصوصیده هم ضدیتلر موجود. طالبان پولیسی تۉرت شبهه لی کیشی نینگ تانیلیب قولگه آلینگنینی خبر بیرگن، لیکن بدخشانده گی محلی منبعلر، طالبان کوچلری نینگ بو واقعه گه علاقه دار ۴۰ دن آرتیق محلی یشاوچینی قولگه آلگنینی ایتماقده لر.
محلی منبعلرگه کۉره، بو پارتلش کونده لیک ایشچیلر اېرتلبلر ییغیله‌دیگن بیر منطقه‌ده یوز بیرگن. بو منبعلر قۉشیمچه قیلدیلر که، پارتلش یوز بیرگنیدن کیین، طالبان کوچلری خلقنی ترقه تیش اوچون هواگه اوق آتگنلر.
فیض آباد شهری سونگگی کونلرده بیر نیچه پارتلشگه گواه بۉلگن، بو ایسه اوشبو ولایتده امنیتی وضعیت نینگ یامانلشگنی و طالبان گه قرشی قوراللی گروه لر فعالیتی نینگ آشگنینی کۉرستماقده.
منبع: Zarin TV
🌐
