پاکستان تحریک انصاف (پی تی آی) حزبی، دوشنبه ایرته لب پولیس خیبر پشتونخواه ایالتی نینگ تورلی منطقه لریده بو حزب اعضالری نینگ اویلریگه باسقین اویوشتیرگنینی ادعا قیلگن. بو اقدام، اوشبو حزب بیلن پاکستان مرکزی حکومتی آره سیده گی سیاسی کیسکینلیکلر دوامیده یوز بېرگن.
تحریک انصاف بیر بیانیه ده ایتگن که، خیبر پشتونخواه ده دیموکراتیک یۉل بیلن سییلنگن حکومت نی برطرف قیلیش و عاجل وضعیت اعلان قیلیش دن مقصد، تروریزم گه قرشی کوره ش اېمس، بلکه عمران خان حزبی نی باستریش دیر. مرکزی حکومت بو عیبلاو لرنی رد ایتگن.
رهبرلیگینی پاکستان نینگ سابق باش وزیری عمران خان قیله دیگن بو حزب، مرکزی حکومت نی بو مهم ایالتده اۉز قدرت پایگاهی نی ضعیف لشتیریش گه اورینیشده عیبلماقده. خیبر پشتونخواه عنعنوی روشده تحریک انصاف حزبی نینگ اساسی پایگاه لریدن بیری سنله دی.
شونینگدېک، اوتگن کېچه پشاور پوهنتونی نینگ کۉپلب محصللری بیر نمایشده، خیبر پشتونخواه ده عاجل وضعیت اعلان ایتیلیشی نی قاره له دیلر. اعتراضچیلر مرکز تامانیدن تعینلنگن والی حاکمیتی گه قرشی شعار بیریب، سییلنگن حکومت نینگ قیته تیکلَنیشی نی طلب قیلدیلر.
کیسکینلیکلر، فدرال حکومت خوفسیزلیک وضعیتی نینگ یامانلشگنی نی بهانه قیلیب، تحریک انصاف رهبرلیگیده گی ایالتی حکومت نی برطرف قیلگن و عاجل وضعیت اعلان قیلگنیدن سۉنگ کوچه‌یدی. لیکن تحریک انصاف بو اقدام نی بیر سیاسی «کودتا» دیب بیله دی.
سیاسی تحلیلچیلر بو سیاسی بحران، آلدیندن خوفسیزلیک و اقتصادی قیینچیلیکلر بیلن روبرو بۉلگن بو ایالتده کوپراق بیقررلیککه سبب بۉلیشیدن خواطرده لر.
منبع: Zarin TV
🌐
