اېران تشقی ایشلر وزیرلیگی نینگ سۉزچیسی اسماعیل بقایی، چابهار بندرگاهیده افغانستانگه یېر بېریلیشی تۉغریسیده گی خبرلر بیر «یانگلیش تۉشینچه» گه اساسلنگنینی ایتگن. جناب بقایی دوشنبه کونی ۲۰ میزان، بیر خبر ییغیلیشیده اېران نینگ بیر بۉلک توپراغی افغانستانگه بېریلدی دېگن ادعالرنینگ هیچ قندهی حقیقی اساسی یۉقلیگینی تأکیدله دی.
اېران تشقی ایشلر وزیرلیگی سۉزچیسی گه کۉره، رسانه لر و اجتماعی ترماقلرده گی بو جنجللی موضوع اېران مجلسی نینگ بیر نماینده سی نینگ سۉزلریدن ناتوغری برداشت قیلیش عاقبتیده یوز بیرگن. او اصلی بحث افغانستان کبی قوروقلیککه محصور مملکت لرنینگ منطقوی همکارلیکلر چوکاتیده بندرگاهلر و آچیق سوولرگه چېقیشی اوچون زمینه یره تیش اېکه نینی آچیقله‌دی.
بقایی بو خلق ارا سویه‌ده بیر عادی طرح اېکه نینی و تجارت همده ترانزیتنی کوچه‌یتیریش اوچون دنیا نینگ تورلی بۉلگه‌لریده اجرا اېتیلیشینی قۉшимچه قیلدی. او بو همکارلیکدن مقصد منطقوی اقتصادی رواجلنیشگه یاردم قیلیش اېکه نینی و هیچ بیر صورتده حاکمیت یا-ده توپراقنی تاپشیریش معناسینی بیلدیرمسلیگینی، بلکه بندرگاه امکاناتینی اوزاق مدتلی ایجاره گه آلیشنی اۉز ایچیگه آلیشی ممکن اېکه نینی تأکیدله‌دی.
بو بیان بیریلیشی اونگدن اۉتگن که اېران مجلسی نینگ نماینده سی محسن زنگنه نینگ چابهارده ۱۱۰ هکتاردن آرتیق یېرنی افغانستانگه اختصاص بېریلیشی تۉغریسیده گی سۉزلری، اجتماعی ترماقلرده اېرانلیک فایده لنٰوچیلر آره‌سیده کینگ و تنقیدی عکس العمل لرنی کیلتیرگن اېدی. کۉپچیلیک بو ایشنی اۉز مملکتی توپراغی نینگ بیر قسمینی قولدن بېریش دېب بیله دی.
چابهار بندرگاهی اۉز ستراتېژیک موقعیتی باعث قوروقلیککه محصور افغانستان اوچون حیاتي اهمیت کسب اېته‌دی. بو بندر پاکستان بندرگاهلریگه باغلی بولمه‌ی، خلق ارا بازارلرگه چېقیش اوچون بیر بدیل یۉل تأمینله‌یدی و افغانستان نینگ تجارتی و ترانزیتی ده اساسی رول اۉینه‌یدی.
اسماعیل بقایی سۉنگیده بو خصوصده افغانستانگه هیچ قندهی رسمی تکلیف بیریلمگه نینی آچیقله‌دی. اونینگ ایتیشیچه، بو موضوع فقط «بیر وزیر نینگ افغانستانده گی رسمی ییغیلیشلریدن بیری نینگ حاشیه‌سیده اورته گه تشلنگن و بیز هم اونی تیکشیره میز دېب اعلان قیلگنمیز.»
منبع: رسانه لر
🌐
