بیرلشگن ملت لر تشکیلاتی نینگ افغانستانده گی رواجلنیش دستور دفتری (UNDP)، طبیعی آفتلر خطری نی کمه یتیریش خلق ارا کونی مناسبتی بیلن، بغلان ولایتیده اهالی نینگ اوی-جایلری، ایکین ییرلری و تیریکچیلیک منبعلرینی طبیعی آفتلردن سقلش اوچون سعی و حرکتلریدن خبر بېردی.
اوشبو تشکیلات سه شنبه کونی، ۲۱ میزانده، اوز ایکس صحیفه سیده، بغلانده ۲۰۲۴ نچی ییل نینگ ویرانگرچیلیک سیلاب لری آرتیدن، «پایدار» (PAIDAAR) لایحه سی آرقه لی سیلابگه قرشی حمایه زیربنا لرینی قوره یاتگنینی یازگن.
تقدیم ایتیلگن معلوماتگه اساساً، بو لایحه افغانستان اوچون مخصوص امانتی صندوق (Special Trust Fund for Afghanistan) نینگ مالی حمایتی بیلن اجرا ایتیلماقده. اونینگ اساسی مقصدی سیلاب خطرینی کمه‌یتیریش و محلی جامعه لرنی اونینگ ییقیتیوچی تاثیراتلریدن حمایه قیلیش دیر.
بو لایحه قتّیق یاغینچیلیک پیتیده سوو آقیمی نی یخشیراق باشقریش و اوی-جایلر همده ایکین ییرلری نینگ بوزیلیشینی آلدینی آلیش اوچون استنادی دیوارلر و باشقه مهندسلیک تاسیساتلرینی قوریشنی اوز ایچیگه آله دی.
بغلان ولایتی ۲۰۲۴ نچی ییل نینگ می آییده یوزلب کیشی نینگ اولیمی و مینگلب عایله نینگ اوی-جایسیز قالیشیگه سبب بولگن توسیزدن و اولیملی سیلاب لرگه گواه بولگن ایدی. بو سیلابلر زیربنا لر، اویلر و ایکین ییرلریگه کتّه زیان ییتکزدی.
UNDP طبیعی آفتلر خطری نی کمه یتیریش خلق ارا کونی مناسبتی بیلن، آفتلرگه قرشی تیارگرلیک و حمایه زیربنالرینی قوریش، جامعه لرنینگ مقاومتی نی آشیریشده و کیله جکده طبیعی آفتلردن کیله دیگن زیانلرنی کمه‌یتیریشده حیاتي رول اویینه شینی تاکیدله دی.
