طالبان حکومتی گه مخالف ایکّی جبهه، بیر مشترک بیانیه ده افغانستانده گی دیپلوماتیک نماینده لیکلر و بیرلشگن ملت لر تشکیلاتی دفترلریگه قرشی احتمالی تهدید خصوصیده خبر بیردی.
مقاومت جبهه سی و آزادی جبهه سی نینگ پنجشنبه کونی ایتیشیچه، اولرنینگ «ایشانچلی» معلوماتلریگه کۉره، طالبان نینگ خوفسیزلیک ساختارلری ایچیده گی یاکه اولر بیلن علاقه دار بعضی عنصرلر افغانستانده خلق ارا منفعتلر و تشکیلاتلرگه قرشی هجوم اویوشتیریش نیتیده بۉلیشی ممکن.
اوشبو مشترک بیانیه ده کېلتیریلیشیچه، بونده ی هجوملر عامللری اۉز هویتلری و اصلی مقصدلرینی یشیریش اوچون، داعش نامی یاکه باشقه مستعار عنوانلردن فایده له نیشی ممکن. بو ایکّی جبهه بو احتمالدن چوقور خواطر بیلدیرگن.
بو ایکّی جبهه افغانستانده جایلشگن بارچه دیپلوماتیک نماینده لیکلر، بیرلشگن ملت لر تشکیلاتی دفترلری، خلق ارا سازمانلر و انسان حقری نهادلریدن اۉز محافظتی و خوفسیزلیک تدبیرلرینی جدی کۉریب چیقیشنی سۉره گن. شونینگدېک، اولر بو نهادلر فقط احتمالی تهدیدلر بیلن باغلیق معلوماتنی آلیش اوچون طالبان مجرالریگه اکتفا قیلمسلیکنی توصیه قیلگن.
مقاومت جبهه سی و آزادی جبهه سی بیرلشگن ملت لر تشکیلاتی و باشقه اعتبارلی خلق ارا نهادلردن، اولر تامانیدن تقدیم ایتیلگن معلوماتنی مستقل روشده تیکشیریب و بو تهدیدلرنی نظارت، سندلشتیریش و تحقیق قیلیش اوچون بیر механизм ایجاد ایتیشنی طلب قیلگن.
بو جبهه لر «مشروع کوره ش» و «قۉرقینچلی حرکتلر» اۉرته سیده گی فرق نی تأکیدلب ایتدیلر: «ملکی اهالی، دیپلوماتیک نماینده لیکلر، بشردوستانه سازمانلر و انسان حقلری نهادلریگه هجوم قیلیش [مشروع کورهشده] هیچ قنده ی اۉرین گه اېگه ایمس.»
بو آگاهلنتیریش، طالبان حکومتی نینگ ایچکی ایشلر وزیرلیگی بیر نیچه کون آلدین مقاومت جبهه سی نینگ تۉرت اعضاسینی قولگه آلگنیدن خبر بیریب و اولرنینگ یوناما دفترینی هجوم قیلیشکه اورینگنینی ادعا قیلگن بیر پیتده صادر ایتیلدی. مقاومت جبهه سی بو ادعانی رد ایتیب و قولگه آلینگن کیشیلرنینگ اوشبو جبهه بیلن هیچ قنده ی علاقه سی یۉق لیگینی ایتگن.
منبع: مقاومت جبهه سی و آزادی جبهه سی نینگ مشترک بیانیه سی
🌐
