بیرلشگن ملت‌لر تشکیلاتیده‌گی افغانستان نماینده‌لیگی نینگ سرپرستی نصیر احمد فایق، بیر قطرلیک وزیر نینگ بیاناتیگه عکس العملده، اقتصادی همکارلیکلر طالبان حکومتینی مشروعیت بیلن تأمینلش اوچون بیر یۉلگه ایلنمسلیگی کېره ک لیگینی آگاهلنتیردی.
سه‌شنبه کېچه‌سی، ۲۸ میزان، ایکس اجتماعی ترماغیده یازگن جناب فایق، اقتصادی رواجلنیش حاکم گروه نینگ قدرتی نی مستحکملنتیریشی کېره ک اېمس لیگینی تأکیدله‌دی. او، «افغانستان نینگ اقتصادی تیکلَنیشینی او مملکت خلقی نینگ اساسی حقوقلریدن، خصوصاً طالبان حاکمیتی آستیده سیستماتیک تبعیض و محرومیت بیلن یوزمه یوز بۉلگن عیاللر و قیزلردن اجره تیب بۉلمه یدی» دېدی.
بو افغان دیپلوماتی، افغانستان خلقیگه بشردوستانه یاردملر دوام اېتیشی کېره ک، لیکن دواملی اقتصادی ثبات افغان خلقی رهبرلیگیده‌گی بیر معتبر و کینگ قورساقلی سیاسی جریانگه محتاج دیر، دېب قۉشیمچه قیلدی. اونینگ سۉزلریگه کۉره، بو جریان خلق اراده‌سی و افغانستان نینگ خلق ارا تعهدلری اساسیده قوریلگن بیر مشروع و جوابگر حکومت نینگ تشکیل تاپیشیگه آلیب باریشی کېره ک.
بو عکس العمل، قطر نینگ خلق ارا همکارلیکلر ایشلری بۉییچه دولت وزیری مریم بنت علی بن ناصر المسند نینگ دوحه ییغیلیشیده بشردوستانه جواب مرحله‌سیدن افغانستان نینگ اقتصادی تیکلَنیشینی حمایت قیلیشگه اۉتیشنی طلب قیلگنی دن سۉنگ یوز بېردی. قطر وزیری اوزاق مدتلی ثباتنی مستحکملش اوچون خصوصی سکتورنی کوچه‌یتیریش و خلق ارا همکارلیکلرنی رواجلنتیریشنی تأکیدله‌گن اېدی.
جناب فایق دوامیده شونده‌ی یازدی: «افغان عیاللری و افغانستان خلقی فقط اقتصادی وعده‌لردن کۉپراق نرسه گه لایق دیرلر. اولر ایرکینلیک، انسانی کرامت، عدالت و مملکتلری نینگ کېله جگینی تعیین قیلیشده مؤثر بیر آوازگه اېگه بۉلیشگه لایق دیرلر.»
قطر، طالبان نینگ افغانستانده قیته حاکمیتگه اېریشگنیدن بېری، بو گروه بیلن کینگ علاقه‌لرگه اېگه بۉلیب و کپینچه طالبان بیلن غرب مملکتلری اۉرته‌سیده واسطه‌چی صفتیده عمل قیلگن.
منبع: ایکس اجتماعی ترماغی
🌐
