افغانستان ملی مقاومت جبهه‌سی، اوشبو جبهه نینگ قوماندانلریدن بیری «میرویس خان» نینگ طالبان کوچلری بیلن تۉقنشوو ده اۉلدیریلگنی نی تصدیقله‌دی. بو جبهه نینگ ایتیشیچه، بو واقعه ایکّی کون آلدین یوز بېرگن.
بو جبهه سه‌شنبه کونی کېچقورون، ۲۸ میزان، بیر اعلامیه نشر قیلیب، میرویس خان نینگ هندوکش تاغلریده جان بېرگنینی ایتدی. اعلامیه‌ده کېلیشیچه، او اۉلدیریلیشی دن آلدین، اوچ طالب عضوینی اۉلدیریب و باشقه ایکّی ته‌سینی یره دار قیلیشگه موفق بۉلگن.
بو بیر حالده دیر که یک‌شنبه کونی، طالبانگه یقین رسانه‌لر، ملی مقاومت جبهه‌سی نینگ بو قوماندانی طالبان استخبارات کوچلری نینگ پنجشیر ولایتی پریان ولسوالیسیده‌گی بیر مخصوص عملیاتیده اۉلدیریلگنی حقیده گزارش بېرگن اېدیلر.
«سجیل» ناملی طالبان کنترولیده‌گی بیر رسانه هم، میرویس خان نینگ ملی مقاومت جبهه‌سی نینگ یوغاری مرتبه لی قوماندانلریدن و عملیاتی ستاد رئیسی صالح محمد ریگستانی نینگ جینی اېکه نینی یازگن اېدی. ملی مقاومت جبهه‌سی اۉز اعلامیه‌سیده بو عایله وی علاقه‌گه اشاره قیلمه‌گن.
افغانستان ملی مقاومت جبهه‌سی، ۲۰۲۱ نچی ییل نینگ اگست آییده طالبان نینگ مملکتده قیته حاکمیتگه اېریشگنیدن سۉنگ احمد مسعود رهبرلیگیده تشکیل تاپدی. بو جبهه طالبان حکومتینی قرشی قوراللی کوره ش آلیب بارماقده و اۉز مقصدی نی «افغانستان نینگ آزادلیگی» نی او گروه نینگ کنترولیدن چیقاریش دېب اعلان قیلگن.
اوتگن ایکّی ییل جریانیده، ایکّی تامان کوچلری اۉرته‌سیده تورلی منطقه‌لرده، خصوصاً پنجشیر، بغلان و تخار ولایتلریده، پراکنده تۉقنشوولر یوز بېرگن. بو تۉقنشوولرده، ملی مقاومت جبهه‌سی نینگ بیر قطار قوماندانلری و اعضالری اۉلدیریلگن.
منبع: ملی مقاومت جبهه‌سی نینگ اعلامیه‌سی
🌐
