طالبان کنترولی آستیده گی د افغانستان بانک (مرکزی بانک) معاونی صدیق الله خالد، جاری شمسی ییل نینگ آخریگه قدر یورتداشلر نینگ بانک حساب لریدن پۇل چېکیش گه قۉییلگن برچه چېکلاولر نینگ کۉتریلیشینی اعلان قیلدی.
جناب خالد یکشنبه کونی، ۳ عقرب ده، کابلده بیر خبری ییغیلیشده خلق نینگ بانک سیستمیگه بولگن ایشانچی آرتگنی و بو ایش جاری ییلده بانک امانتلریده بیش میلیارد افغانی آرتيشگه سبب بۉلگنینی ایتدی. او، نقدینگی وضعیتی یخشی لنگنی بیلن مرکزی بانک ییل آخریگه قدر برچه چېکلاولرگه چیک قۉییش گه قادر بۉلیشینی تاکیدله دی.
او شونینگدېک بو بانک نینگ مملکت بۉیله ب بانکی و مالی خدمت لرنی کینگه‌یتیریش ریجه لریدن خبر بېریب، بو خدمت لرنی برچه ولایت لرگه، ولسوالی لرگه و حتی شهرلرده گی اولوغ ساتیب آلیش مرکز لریگه ییتکزیشگه حرکت قیلیاتگن لرینی ایتدی. بو اقدام خلق نینگ مالی خدمت لرگه قول تاپیشینی آسانلشتیریشی ممکن.
بوندن تشقری، مرکزی بانک معاونی «اسلامی بانکچی لیک» رواجلنیشیگه اشاره قیلدی. اونینگ ایتیشیچه، مملکت ده آلتی تجارتی بانک اسلامی بانک صفتیده فعالیت قیلیش اوچون کېره کلی شرط لرنی تۉلدیریب و تېزلیکده بو چارچوبه ده فعالیت قیلیش اوچون تۉلیق جوازنی قولگه کیریته دی. بو طالبان نینگ مملکت اقتصادی سیستمی نی اسلامی لشتیریش سعی و حرکت لری نینگ بیر بوله گی دیر.
بانکی چېکلاولر طالبان نینگ ۱۴۰۰ نچی ییل اسد آییده افغانستانده قدرت نی قیته قولگه کیریتگنیدن سۉنگ نقد پۇل نینگ جدی کم چیلیگی باعث و بانک سیستمی نینگ ییقیلیشی نینگ آلدینی آلیش اوچون قۉییلگن اېدی. باشده، هر بیر مشتری فقط هفته سیگه ۲۰۰ دالر یاکه ۲۰ مینگ افغانی اۉز حسابی دن چېکیشی ممکن اېدی.
بو چېکلاولر تدریجی و تورلی باسقیچلرده آشدی. حاضرگی پیتده، انفرادی حساب لردن پۇل چېکیش میزانی آییده ۵۰۰ مینگ افغانی و دالر حساب لری اوچون آییده ۱۵ مینگ دالر دیر. بو چېکلاولرنینگ تۉلیق یوق قیلینیشی افغانستانده اقتصادی وضعیت نی عادی لشتیریش یۉلیده مهم بیر قدم بۉلیشی ممکن.
منبع: د افغانستان بانک
🌐
