په پنجشېر ولایت کې د طالبانو ځایي چارواکو اعلان کړی چې د لومړي ځل لپاره به له دغه ولایت څخه استخراج شوي زمرُد په پلازمېنه کې لیلام شي. دا لیلام ټاکل شوې چې په کابل کې د افغانستان په نړیوال نندارتون مرکز کې ترسره شي.
په پنجشېر کې د طالبانو والي، محمد اغا حکیم، دا اقدام کورنیو او بهرنیو سوداګرو ته د پنجشېر د کانونو د ظرفیتونو د ورپېژندلو لپاره یو مهم فرصت بللی دی. دا لیلام د پنجشنبې په ورځ، د لړم په ۷مه، پلان شوی او تمه کیږي چې ډیری پیرودونکي به پکې ګډون وکړي.
د پنجشېر د زمرُدو کانونه، چې نړیوال شهرت لري، د افغانستان لپاره د عاید یوه مهمه سرچینه ګڼل کیږي. واک ته د طالبانو له بیا راتګ راهیسې، د دې قیمتي ډبرو استخراج او پلور د دې ډلې تر څارنې لاندې دوام لري. طالب چارواکي وايي چې سږ کال له پنجشېر څخه د پلورل شویو زمرُدو ارزښت نږدې ۴۰۰ میلیونه افغانیو (شاوخوا ۶.۱۲ میلیونه ډالرو) ته رسېدلی دی.
خو څېړنیزو راپورونو د دې پروسې روڼتیا تر پوښتنې لاندې راوستې ده. د افغانستان انټرنشنل یوه پخواني راپور ښودلې چې د زمرُدو د استخراج لویه برخه د هغو قراردادیانو په واک کې ده چې له طالبانو سره مستقیمې اړیکې لري او دا پروسه د دې ډلې د ځواکونو تر څارنې لاندې ترسره کیږي.
یوې باخبرې سرچینې دې رسنۍ ته ویلي و چې له نیمایي څخه کم استخراج شوي زمرُد رسمي لیلامونو ته لاره پیدا کوي او لویه برخه یې له غیر رسمي لارو او په نامعلومو بیو پلورل کیږي. د هغه په وینا، د پام وړ عایداتو سره سره، دې صنعت د پنجشېر د خلکو د ځایی اقتصاد په ښه کولو کې د پام وړ اغیزه نه ده کړې.
د طالبانو په رسمي اعلانونو کې معمولا د بنسټیزې بیې، د سیالۍ پروسې او د ډبرو د ارزونې د معیارونو په اړه جزئیات نه ورکول کیږي او د پلورلو دمخه د خپلواکو کارپوهانو لخوا د دې قیمتي ډبرو د ارزونې کومه نښه نشته. دا نشتوالی د هیواد د طبیعي زیرمو د مدیریت په اړه اندیښنې راپورته کړي دي.
سرچینه: افغانستان انټرنشنل
🌐
