سویدن حکومتی خوفسیزلیک تشویشلری و محرم معلومات لرنینگ فاش ایتیلیشی احتمالی سببلی، بیر قطار دولت اداره لریده «چت جی پی تی» و «کلود» مصنوعی ذکاوت مدل لریدن فایده لنیش نی منع قیلدی. بو چیکلاو دوشنبه کونی دن باشلب اجرا ایتیلدی.
سویدن دولت رادیوسی نینگ گزارشیگه اساساً، بو اداره لرنینگ ایشچی لریگه بو ایکی برنامه نینگ اورنیگه مایکروسافت شرکتی نینگ «کوپایلوت» مصنوعی ذکاوت مدلی دن فایده لنیش توصیه ایتیلگن. بو قرار دولت ایشچی لری تامانیدن ایشلب چیقاریلگن مصنوعی ذکاوت واسطه لریدن فایده لنیش طرزلری حقیده گی تشویش لرنینگ آشیب باریشی آرتیدن آلینگن.
سویدنلیک مقام لر تشویشده لر کیم، دولت ایشچی لری بیلمه‌گن حالده محرم و حساس معلومات لرنی شونده ی برنامه لر اختیاریده قوییب قوییشلری ممکن کیم اولرنینگ تولیدچی شرکتلری سویدن حکومتی بیلن معلومات لرنی سقلش اوچون مشخص بیر کیلیشوونامه گه ایگه ایمسلر. بو ایش ملی خوفسیزلیک و شهرداش لرنینگ شخصی حریمینی خطر آستیگه قوییشی ممکن.
بو تشویش لر سویدن ترانسپورت اداره سیده گی بیر ایچکی تیکشیروو، بو اداره نینگ ایشچی لری نینگ تقریباً اون فرقلی مصنوعی ذکاوت واسطه سیدن فایده لنگنینی کورستگنیدن کیین کوچه ییب کیتدی. تیکشیرووچیلر بعضی موردلرده، حساس دولتی معلومات لرنینگ بو برنامه لرگه کیریتیلگنی و مصنوعی ذکاوت تامانیدن تولید ایتیلگن جواب لردن هم تۉغری و کیره کلی دقت بیلن فایده لنیلمگنی نی انیقله‌دیلر.
سویدن دولت دفتر لری نینگ دیجیتال لشتیریش بولیمی مدیری میکائیل وترکرانتس، آگاهلنتیردی کیم، ارائه قیلگن شرکت لر بیلن رسمی کیلیشوو بولمه گن حالده مصنوعی ذکاوت واسطه لریدن فایده لنیش، دولت معلومات امنیتی نی جدی قیینچیلیک لر بیلن روپه ره قیلیشی ممکن.
عکسینچه، سویدن حکومتی مایکروسافت نینگ «کوپایلوت» برنامه سیدن فایده لنیشگه رخصت بېرگن. بو برنامه دقیق خوفسیزلیک تیکشیروولری اوتکزیلگندن کیین تاییدلنگن و اونگه کیریتیلگن معلومات لرنی سقلش اوچون کوپراق تدبیرلر هم نظرده توتیلگن.
بو منع فقط سویدن نینگ بیر قطار دولت اداره لرینی اوز ایچیگه آله دی و عادی شهرداش لر هلی هم شخصی فایده لنیش اوچون چت جی پی‌تی، کلود و باشقه مصنوعی ذکاوت واسطه لریگه قول تاپیشلری ممکن.
منبع: سویدن دولت رادیوسی
🌐
