ایران تشقی ایشلر وزیرلیگی سۉزچیسی دوشنبه کونی، ۱۱ عقربده، تهران نینگ کېله جک آیلرده افغانستان تۉغریسیده باشقه بیر تۉرت تامانلمه ییغیلیش اۉتکزیش اوچون ریجه لشتیریاتگنینی اعلان قیلدی. اسماعیل بقایی نینگ ایتشیچه، منطقه وی اۉزگریشلر ایران نینگ افغانستان بیلن باغلیق جریانلرنینگ اهمیتی و بو مملکت نینگ منطقه خوفسیزلیگیده توتگن اۉرنیدن غافل بۉلیشیگه سبب بۉلمه‌گن.
جناب بقایی هفته‌لیک خبریی ییغیلیشده قۉشیمچه قیلیشیچه، ایران تشقی ایشلر وزیرلیگی مقام‌لری اۉز منطقه وی سفرلریده، جمله دن تورکیه و پاکستانگه، افغانستان موضوعسینی کۉزه تیب بارگنلر. اونینگ سۉزلریگه کۉره، میزان آییده مسکو فارمتی ییغیلیشی حاشیه‌سیده هم بو جریاننی دوام ایتتیریش اوچون مصلحتلشوو بولیب اۉتگن.
ایران تشقی ایشلر وزیرلیگی سۉزچیسی، میزان آییده اۉتکزیلگن منطقه وی ییغیلیشلرگه، جمله دن شانگهای همکارلیک تشکیلاتی ییغیلیشی، تۉرت تامانلمه ییغیلیش و مسکو فارمتی ییغیلیشیگه اشاره قیلیب، تهران نینگ افغانستانده‌گی اۉزگریشلرنی جدیت بیلن کۉزه تیب باریاتگنینی ایتدی. او کېله جک ییغیلیش نینگ انیق زمانی و قتنه شوچیلر سویه‌سی حقیده کۉپراق تفصیلات بېرمه‌دی.
افغانستان بۉییچه منطقه وی تماس گروهی ایران اسلامی جمهوریتی تشبثی بیلن و منطقه مملکت‌لری نینگ افغانستانده‌گی اۉزگریشلرگه نسبتاً یانداشوینی هماهنگ قیلیش مقصدی بیلن تشکیل تاپگن. بو گروه ایران، چین، روسیه و پاکستان نینگ خاص وکیل لریدن تشکل تاپگن.
بو گروه نینگ مصلحتلشوو لری نینگ بیرینچی دوری ۱۴۰۲- ییل ۹ دلوده کابلده اۉتکزیلدی و اونده ایران، چین، پاکستان، روسیه و منطقه نینگ بیر قطار مملکت‌لری نینگ وکیل‌لری اشتراک قیلدی.
ایککینچی ییغیلیش ۱۴۰۳- ییل ۱۹ جوزادا تهرانده ایران، چین، روسیه و پاکستان وکیل‌لری حضوری بیلن اۉتکزیلدی. طالبان حکومتی هم دعوت قیلینگن اېدی، لیکن اولر اشتراک قیلمه‌دی. بو ییغیلیشده طالبان بیلن جمعی مناسبت، تروریستیک تهدیدلر و افغانستان نینگ خوفسیزلیک و اقتصادی وضعیتی کبی موضوعلر کۉریب چیقیلدی.
ایران نینگ افغانستان بۉییچه خاص وکیلی حسن کاظمی قمی، او وقتده بو ییغیلیشلرنینگ اوچینچی دوری نینگ اۉتکزیلیشینی کۉریب چیقیش خبرینی بېرگن اېدی. حاضر ایسه تهران افغانستانده برقرارلیک اوچون همکارلیک یۉللرینی ایزلش مقصدیده بو منطقه وی صحبتلرنینگ کېینگی دوریگه مېزبانلیک قیلیشگه تیارگرلیک کۉره یاتگنی کۉرینه‌دی.
منبع: ایران رسانه‌لری
🌐
