افغانستان نینگ سابق ایچکی ایشلر وزیری و سیاسی شخصیتی عمر داوودزی، «افغانستاننی قوتقریش اوچون ملی مجمع» رهبرلیک کینگشی نینگ دوره‌یی رئیسی اوله‌راق سیلنگنینی اعلان قیلدی. بو مسئولیت اونگه بیر آی‌لیک دوره اوچون تاپشیریلگن.
جناب داوودزی دوشنبه کونی، ۱۱ عقرب، بیر پیامده بو مجمع نینگ رهبرلیک کینگشی اعضالری نینگ ایشانچی اوچون منتدارچیلیک بیلدیردی. او بو مسئولیتنی مملکتی و خلقی آلدیده «هم بویوک بیر افتخار و هم آغیر بیر مسئولیت» دیب آته‌دی و باشقه اعضالرنینگ مصلحتی و همکارلیگی بیلن اونی تۉغری بجا کیلیتریشگه امید بیلدیردی.
دوره‌یی رئیسنی سیله ش، طالبانگه قرشی بو سیاسی ائتلاف نینگ چرخشی رهبرلیک ساختاری نینگ بیر قسمی دیر. اعلان قیلینگن ساختارگه کۉره، رهبرلیک کینگشی هر آی اۉز اعضالری آره‌سیدن ایشلرنی هماهنگ قیلیش اوچون بیر دوره‌یی رئیس سیله‌یدی.
افغانستاننی قوتقریش اوچون ملی مجمع ۱۴۰۳-ییل ۱۵ قوسده (۵ دسمبر ۲۰۲۴) بیر قطار سابق جهادی رهبرلر و سابق جمهوریت حکومتی نینگ یوکسک مرتبه لی رسمی‌لری حضوری بیلن موجودیتینی اعلان قیلگن ایدی. بو ائتلاف نینگ مقصدی، طالبان حکومتینه قرشی بیرگه لیکده سیاسی موضع شکللنتیریش دیب ایتیلگن.
احمد مسعود، عطامحمد نور، عبدالرشید دوستم، کریم خلیلی، صلاح الدین ربانی، محمد محقق، عبدرب الرسول سیاف و محمد یونس قانونی کبی تانیقلی چهره‌لر بو ائتلاف بیلن باغلیق دیر. بو کینگش طالبانگه قرشی مختلف سیاسی جریان‌لرنی بیر چتر آستیده هماهنگ قیلیشگه حرکت قیلماقده.
۱۴۰۴-ییل ۱۹ حملده (۸ اپریل ۲۰۲۵) عمر داوودزی نینگ بو کینگش نینگ اجرایی رئیسی اوله‌راق سیلنگنی و ۳۴ ینگی اعضا قۉشیلیشی بیلن اونینگ اعضالری سانی ۷۱ کیشیگه ییتگنی حقیده گزارش بېریلگن ایدی. دوره‌یی ریاست نینگ آیله نیشی، بو سیاسی جریان نینگ رهبرلیگیده پویالیک و اشتراکنی سقلش اوچون حرکتنی کۉرسه ته‌دی.
طالبان نینگ قدرت‌گه قیتیب کیلیشی‌دن بویان، سابق حکومت چهره‌لری تامانیدن مملکت تشقریسیده بیر نیچه سیاسی ائتلاف تشکیل ایتیلگن، لیکن بو حرکت‌لر هلیگچه افغانستان ایچیده طالبان حکومتی اوچون جدی بیر چالشگه ایلنه آلمه‌گن.
منبع: عمر داوودزی
🌐
