افغانستانده ژورنالیستلر طالبان حکومتی تامانیدن کۉپه ییب باره‌یاتگن باستروو و تهدیدلرگه روپه‌رو ایکن، بیرلشگن ملت‌لر تشکیلاتی باش کاتبی نینگ بو مملکت بۉییچه خاص وکیلی رباب فاطمه، ایرکک و عیال ژورنالیستلرنینگ خوفسیزلیگی و امنیتی سقلنیشینی طلب قیلدی.
او دوشنبه کونی، ۱۱ عقربده، «ژورنالیستلرگه قرشی جنایت عامللری نینگ جزادن معافیتینی توگه تیش خلق ارا کونی» مناسبتی بیلن یۉلله‌گن پیامیده، ژورنالیستلرنینگ ایشی صحبتنی کوچه‌یتیریش، تینچلیکنی تأمینلش و یخشی حکومتدارلیکنی مستحکملشده اساسی رول اۉینه شینی ایتدی.
رباب فاطمه قۉشیمچه قیلدی: «حیاتینی حقیقت ایزلشگه بغیشله‌گن ایرکک و عیاللرنینگ خوفسیزلیگی و امنیتی، افغانستانده و بوتون دنیاده همه میز اوچون بیر اساسی اولویت بۉلیشی کېره ک.» بو پیام افغانستانده رسانه‌لر آزادلیگی جدی شکلده چېکلنگن بیر پیتده نشر ایتیلماقده.
افغانستان جمهوریت دوریده ژورنالیستلر اوچون اینگ اۉلیملی مملکتلردن بیری حسابلنر اېدی. گرچه طالبان قدرتگه قه یتیب کیلگندن سۉنگ ژورنالیستلرنینگ اۉلدیریلیش سانی کمه یگن، لیکن بو گروه رسانه‌لر و ژورنالیستلرنینگ فعالیتی و ایشیگه جدی چېکلاولر و سانسور قۉیگن.
طالبان حکومتی مستقل و منتقد ژورنالیستلرنی نظامگه قرشی فعالیت قیلیش عیبی بیلن قولگه آلیب، زندانگه تشله ماقده. اینگ سۉنگگی موردده، چېگره بیلمس خبرچیلر تشکیلاتی، طالبان رهبری ملا هبت‌الله آخوندزاده نی ۲۰۲۶- ییل اوچون «رسانه‌لر آزادلیگی دشمنلری» رویختیگه کیریتدی.
رسانه‌لرنی حمایه قیلوچی نهادلرنینگ گزارشلریگه کۉره، ۲۰۲۱- ییل اگست آییده طالبان افغانستاننی تکرار قولگه کیریتگندن سۉنگ، بو مملکت نینگ مستقل رسانه‌لری نینگ تقریباً یریمی یاپیلگن و یوزلب ژورنالیست و رسانه خادمی خوفسیزلیک تهدیدلری و ایش چېکلاولری سبب مملکتنی ترک ایتگنلر.
منبع: یوناما
🌐
