فرانسه تشقی ایشلر وزیری ژان-نویل بارو، پاریسده بیر قطار افغان عیاللر بیلن اوچره شیب، مملکتی نینگ افغانستانده «سیستماتیک محروم قیلماق سیاستی»گه قرشی اولرنی قاطع قۉللب قوتلشینی تأکیدله‌دی.
فرانسه تشقی ایشلر وزیرلیگی سۉزچیسی پاسکال کانفاورو، دوشنبه کېچه‌سی، ۱۱ عقربده، ایکس اجتماعی ترماغیده، بو اوچره شوو ماری-کلیر فکر مرکزی تامانیدن اویوشتیریلگن «تېنگلیک اوچون حرکت» تدبیری جریانیده بۉلیب اۉتگنینی یازدی. سۉزچی نشر قیلگن بیانیه‌ده کېلیشیچه، سیستماتیک محروم قیلماق سیاستی میلیونلب عیال و قیز نینگ کېله جگینی و شونینگدیک افغانستانده برقرار تینچلیک و ثبات نینگ هر قنده‌ی چشم اندازینی خطر آستیگه قۉیه‌دی.
بیانیه‌گه اساساً، فرانسه تشقی ایشلر وزیری کابل طالبان قۉلیگه توشگندن بېری، فرانسه قۉشنی مملکتلرده ویزه صادر قیلیش بیلن ۱۷ مینگ افغان ایرکک و عیال نینگ اۉز توپراغیگه کیریشیگه زمینه یره تگنینی اعلان قیلدی.
او شونینگدیک افغانستان خلقیگه سېزیلرلی بشردوستانه یاردم‌لر بېریلگنی خبرینی هم بېردی. بو یاردم‌لر ۱۰۰ مینگ ساغلیق مصلحتی، آغیر سوءتغذیه دن اذیت چېکه‌یاتگن بش یاشدن کیچیک اوچ مینگ باله‌گه پریباریش، ۳۵ مینگ قیزگه کیفیتلی تعلیم خدمت لریگه قول ییتیشنی تأمینلش و تقریباً ۱۰۰ مینگ تُن ضرور بشردوستانه یاردم‌لرنی انتقال قیلیش آلتی عملیاتینی اۉز ایچیگه آلگن.
فرانسه تشقی ایشلر وزیری بو اوچره شووده شونینگدیک پاریس نینگ اۉز اروپالی شریک‌لری بیلن همکارلیکده افغانستانده بشریتگه قرشی جنایتلرنی تانیش و سندلشتیریش اوچون قیلگن سعی و حرکتلریدن خبر بېردی. اونینگ ایتیشیچه، بو حرکتلر بیرلشگن ملت‌لر تشکیلاتی نینگ انسان حق‌لری کینگشینی بیر مستقل خلق ارا مېخانیزم ایجاد قیلیشگه مجبور قیلگن.
جناب بارو نینگ قۉشیمچه قیلیشیچه، فرانسه افغان عیاللرنی حمایه قیلیش اوچون، باشقه بیر نیچه مملکت بیلن بیرگه، خلق ارا جنایی محکمه (ICC) یانیده بیر جریاننی باشله‌گن که بو طالبان نینگ بیر نیچه مقامیگه قرشی قولگه آلیش حکملری نینگ صادر بۉلیشیگه آلیب کیلگن.
منبع: فرانسه تشقی ایشلر وزیرلیگی
🌐
