افغانستانده ایشسیزلیک و ایقتیسادی قیینچیلیکلر کوچه‌یشی بیلن، بیر قنچه کیشیلر تیک‌تاک اپلیکیشنیده جانلی نشرلر اۉتکزیب، محتاجلرگه بې‌پول نان ترقه‌تیشگه قۉل اورگنلر. اوشبو اوصولده، بو کیشیلر نانوایلیکلرده برنامه‌لر یۉلگه قۉییب، چیت ایلده‌گی افغانلردن مجازی ساوغالر آله‌دیلر و اونینگ درامدی بیلن نان ساتیب آلیب ترقه‌ته‌دیلر.
معلوماتلرگه کۉره، کونده یوزلب عیال و ایرکک بې‌پول نان آلیش اوچون نانوایلیکلر آلدیگه صف تارتماقده‌لر. بیر ایشسیز کیشی هېچ قنده‌ی ایش و درامد تاپالمه‌گنی صببدن بو نانوایلیکلرگه بې‌پول نان اوچون مراجعت قیلیشگه مجبور بۉلگنینی بیان قیلگن.
صفده تورگن بیر عیال هم ادعا قیلیشیچه، اهالی صدقه کۉزلَمه‌یدی، بلکې ایش یۉقلیگی و عیاللر نینگ ایشلش زمینه‌لری چېکلنگنی باعث، عایله‌لرینی باقیش اوچون اوشبو بې‌پول نانلرگه کۉز تیکیشگه مجبور بۉلیشگن.
تیک‌تاکده برنامه آلیب بارووچی بیر نانوای نینگ ایتیشیچه، کونده ۱۰۰۰ دن ۲۰۰۰ گچه بې‌پول نان ترقه‌تیلماقده و بو یاردم چیت ایلده‌گی وطنداشلر تامانیدن تیک‌تاک آرقه‌لی یوباریلگن ساوغالر اساسیگه عملگه آشیریله‌دی.
بیراق، تیک‌تاک مجازی ساوغالر نینگ تخمیناً ۶۰ فایزینی اۉزی اوچون کسر قیلیشی سببلی، بو پروسه نینگ مالیوی شفافلیگی بۉییچه خواطرلر هم بار. بو وضعیت بی بیرلشگن ملتلر تشکیلاتی نینگ رواجلنتیریش برنامه‌سی هسابلشسیگه کۉره، ۲۰۲۵ ییلده افغانستان نینگ ۷۴ فایز اهالیسی، یعنی ۲۸ میلیون کیشی، دستلبکی احتیاجلرینی تأمینلشده قیینچیلیککه روپه‌رو بۉلگن بیر شرایطده یوز بېرمه‌قده.
شونینگدیک، اوچا معلوماتیگه کۉره، ۲۰۲۶ ییل اوچون طلب قیلینگن ۱٫۷۱ میلیارد دالر بشری یاردملر بودجه‌سیدن حاضرگچه فقط ۳۳۶ میلیون دالر یعنی ۲۰ فایزی تأمینلنگن. متخصصلر نینگ باوریچه، بو قیینچیلیکلرنی یکونلش اوچون بۉش ایش اۉرینلری یاره‌تیلیشی و عیاللر فعالیتیگه قۉییلگن چېکلاولر بېکار قیلینیشی کیره‌ک.
منبع: رسانه‌ای معلوماتلر
🌐
