سعودی عربستان دولتی آژانسلری، اوشبو مملکت نینگ مدینه شهریده جایلشگن شرق دن غرب گه نفت انتقال قیلووچی ستراتیژیک ترماغی هجومگه اوچره گنینی معلوم قیلدی. ترقه‌تیلگن معلوماتلرگه کۉره، حادثه آرتیدن کیچیک یانغین یوز بېرگن و او تیزده مهار قیلینگن.
حساباتلرگه کۉره، اوشبو واقعه ده هیچ کیم هلاک بۉلمه‌گن یا تن جراحتی آلمه‌گن و نفت پایپ‌لاینی نینگ فعالیتی هم توخته‌تیلمه‌گن. دولتی منبعلر بو هجوم دوشنبه کونی، ۱۸ عقرب ده یوز بېرگنینی ایتگن.
مذکور ترماق تقریباً ۱٬۲۰۰ کیلومتر اوزونلیککه اېگه بۉلیب، عربستان جزیره‌سینی کېسیب اۉتگن حالده، شرق تماندن قیزل دینگیز یاره‌سیده گی ینبع بندریگه نفت ییتکزیب بېره دی. بو یۉل عربستان گه هرمز بوغازی دن اۉتمه‌سدن نفت صادر قیلیش امکانیتینی یره‌ته دی.
رویترز آژانسی نینگ بیلدیروشیچه، منطقه‌ده گی توقنه‌شولر سببی بیلن هرمز بوغازیده گی قینچیلیکلر آرتیدن، عربستان کونیگه تخمینن تۉرت میلیون بشکه خام نفتنی اوشبو ترماق ارقه‌لی ینبع گه ییتکزه دی، بو اېسه دنیا نفت تدارکاتی نینگ تۉرت فایزینی تشکیل اېته دی.
اوشبو ترماق اۉتگن سپتامبر آییده هم درون هجوملری سبب بیر نېچه کون اۉز فعالیتینی تۉختاتگن اېدی و سعودی عربستان اوشبو هجوملرنی عراق کوچلریگه باغلگن اېدی.
سعودی عربستان رسمی لری حاضرگه قدر دوشنبه کونگی هجوم نینگ سببی یا عامللری حقیده قۉشیمچه معلومات بیرمه‌گن.
منبع: رویترز و سعودی دولتی رسانه‌لری
🌐
