افغانستانده بیرلشگن ملتلر تشکیلاتی نینگ همکارلیک هیئتی (یوناما) باشلیغی رباب فاطمه قندهار ولایتیگه سفر قیلیب، بوتون دنیا ساغلیقنی سقلش تشکیلاتی تامانیدن قوللب-قوتلنماقده بۉلگن بیر ساغلیقنی سقلش مرکزینی باریب کۉردی.
دوشنبه کونی بوتون دنیا ساغلیقنی سقلش تشکیلاتی اکس ترماغیده بیر بیلدیرو نشر قیلیب، رباب فاطمه قندهاردهگی میرویس شفاخانهسیده ولادی فیستول بولیمیدن کۉریش قیلگنینی معلوم قیلدی.
مذکور تشکیلات نینگ ایتیشیچه، یوناما باشلیغی دوالنهیاتگن کسللر بیلن اوچرهشدی و تخصصی خذمتلر ارایه قیلهیاتگن عیال دوکتورلر و ساغلیقنی سقلش خادملری بیلن صحبتلشدی.
خانم فاطمه اوشبو خط مقدم خادملری نینگ فیستول کسللیگیدن عیاللرنی قوتقریش اوچون اساسی رول اۉینشینی قید اېتیب، بو قیینچیلیک توغیش وقتی نینگ اینگ یمان ضررلریدن بیری اېکنینی و درمانی عیاللرگه ساغلیق، عزت و اۉزیگه ایشانچنی قیته بېرېشینی بیلدیردی.
بوتون دنیا ساغلیقنی سقلش تشکیلاتی تأکیدلهشیچه، یوناما رهبری نینگ بو بولیمگه تشریفی، ییللردیر عذاب، تهمت و ایجتمایی چیکتلب قۉییش بیلن دوچ کېلگن عیاللر اوچون آلدی آلینیشی، دوالهنیشی و قیته تیکلهنیش خذمتلریگه دواملی قول قیتیریش نه قدر اهمیتلی اېکنینی کۉرسهتهدی.
رباب فاطمه تقریباً بیر آی آلدین یوناما نینگ ینگی باشلیغی صفتیده ایش باشلهدی و بوندن آلدین بامیان و ننگرهار ولایتلریگه هم سفر قیلیب، ملتلر تشکیلاتی نهادلری نینگ بشردوستلیک و ساغلیقنی سقلش خذمتلرینی کۉزدن کېچیرگن اېدی.
منبع: بوتون دنیا ساغلیقنی سقلش تشکیلاتی
🌐