امریکا قوشمه ایالتلری خوفسیزلیک اداره‌لری اوشبو مملکت نینگ هوا یۉللری شرکتلریگه القاعده ترماغی تامانیدن اوچاق آلیب قاچیش تشویق قیلینگن چقیریقلر حقیده آگاهلنتیریش بېردی. سی‌اېن‌اېن معلوماتیگه کۉره، مذکور تشویقاتلر فلای‌دوبی نینگ تل‌اویو تامان بارووچی اوچاقنی آلیب قاچیش اوچون قیلینگن ناکام اورینیشنی مقته‌گن.

امریکا فدرال پولیسی (اف‌بی‌آی)، ایچکی خوفسیزلیک و ترانسپورت خوفسیزلیک اداره‌سی بیرلشگن بیلدیرووده هوا ترانسپورتی فعاللریگه القاعده ترماغلری تیجارتی اوچاقلرنی آلیب قاچیشنی ترغیب قیله‌یاتگانینی خبر بېردی. اوشبو گروه اۉز ترغیباتلریده امریکا و اسرائیل منفعتلریگه قرشی هجوم قیلیشنی سۉره‌گن.

قانوننی اجرا قیلووچی بیر منبع سی‌اېن‌اېن‌گه ایتیشیچه، حاضرگی وقتده انیق و تصدیقلنگن بیر خوف موجود ایمس. منبع نینگ بیلدیریشیچه، اوشبو آگاهلنتیریش یالغوز معلومات الماسه ش نینگ عادی ترتیبی اساسیده نشر قیلینماقده.

استخباراتی بیلدیرووده تاکیدلنیشیچه، القاعده ترماغلری هوا ترانسپورتی تدبیرلرینی بوزیب اۉتیش و تیجارتی اوچاقلردن سوءاستفاده قیلیش توغریسیده‌گی اسکی سیاستلرینی ینگیده‌ن ترقاتماقده. بو خبرداری امریکاده اینگ کۉپ سفر قیلاینه‌دیگن بیر کونلرگه تۉغری کېلگن، چون ۲۴ دن ۳۰ نوامبرگچه ۶ میلیون کیشی سفری کوتیلماقده.

اوشبو آگاهلنتیریش سپتامبر آییده دوبی‌دن تل‌اویو تامان اوچگن پروازده یوز بېرگن واقعه‌گه اشاره قیله‌دی. اۉشنده همام الحمامی اسملیک پیلوت باشقه بیر پیلوتگه بالته بیلن هجوم قیلیب اوچاقنی قوله‌تیشگه اورینگن، بیراق جراحت آلگن ایککینچی پیلوت بونی تۉخته‌تیب قالگن اېدی.

خوفسیزلیک کوچلری هوا ترانسپورتی خادملریدن تیکشیرولرنی بوزیشگه اورینیش، غیرعادی سۉراولر یا-ده کییم و تانیتووچی نیشانلر یۉقالگن حالتلرنی کۉرگنلرینی بېواسطه خبر قیلیشنی سۉره‌گن.

منبع: سی‌اېن‌اېن

🌐

Author