په ملګرو ملتونو کې د افغانستان د دایمي استازولۍ سرپرست، نصیر احمد فایق، په دغه سازمان کې په یوه غونډه کې ټینګار وکړ چې د «ښو» او «بدو» ترهګرو ترمنځ باید هیڅ ډول توپیر شتون ونه لري او ترهګري باید په ټولو بڼو وغندل شي.
ښاغلي فایق، چې د «نړیوالې ترهګرۍ د له منځه وړلو لپاره د اقداماتو» په اړه د ملګرو ملتونو د عمومي اسمبلۍ د شپږمې کمیټې په غونډه کې خبرې کولې، وویل چې د افغانستان خلکو د ترهګرۍ او د نیابتي ځواکونو په توګه د افراطي ډلو له وسیله یي کارونې څخه ژور کړاو ګاللی دی.
هغه زیاته کړه: «موږ ترهګري په کلکه غندو، هرچېرې او د هرچا لخوا چې ترسره شي. هیڅ سیاسي موخه، ایډیالوژیکي ادعا یا مذهبي توجیه نشي کولی ترهګریز تاوتریخوالی توجیه کړي.»
د افغانستان استازي د طالبانو له واکمنۍ وروسته وضعیت ته په اشارې سره وویل چې د یوه مشروع حکومت په نشتوالي کې، «افراطیت او ترهګري» د افغانستان او سیمې لپاره په جدي ګواښونو بدل شوي دي. هغه د ملګرو ملتونو ډیری راپورونو ته په استناد چې په افغانستان کې یې د ترهګرو ډلو شتون او فعالیتونه مستند کړي دي، په دې برخه کې د طالبانو د ځواب ویلو غوښتنه وکړه.
ښاغلي فایق دغه راز د افغانستان پر خاوره د پاکستان بریدونه، چې د ترهګرۍ سره د مبارزې په پلمه ترسره کیږي، «غیرقانوني» وبلل او ټینګار یې وکړ چې «له ترهګرۍ سره مبارزه نشي کولی غیرقانوني بریدونه یا د ملکي وګړو ژوند ته بې پروايي توجیه کړي.»
هغه له نړیوالې ټولنې وغوښتل چې د یوه مشروع، ځواب ویونکي او ټول شموله حکومت ملاتړ وکړي چې د افغان ولس پر ارادې ولاړ وي. ښاغلي فایق په پای کې د ترهګرۍ سره د مبارزې د یوې اغیزمنې تګلارې د یوې برخې په توګه د ښځو او نجونو د حقونو پر بیا رغونه او د هغوی د بشپړ ګډون پر تضمین ټینګار وکړ.
سرچینه: Zarin TV sources
🌐
