په پکتیا کې د طالبانو والي مهرالله حماد ادعا کړې چې د دې ډلې واکمنۍ د دې لامل شوې چې د افغانستان خلک د شریعت سره سم ژوند کولو ته چمتو شي او په دې توګه ځانونه "د اخرت له عذاب" څخه وژغوري. هغه دا څرګندونې د "امر بالمعروف قانون" د تطبیق کمیټې په غونډه کې وکړې.
په پکتیا کې د طالبانو د والي د دفتر د خبرپاڼې له مخې، حماد په دې غونډه کې ویلي چې په دې ولایت کې یې پر ټولو دولتي کارکوونکو شریعت سل په سلو کې پلی کړی دی. هغه ټینګار وکړ چې د دوی د حکومت اصلي موخه د دیني احکامو د بشپړ پلي کیدو لپاره د زمینې برابرول دي.
د امر بالمعروف او نهی عن المنکر قانون، چې د طالبانو د مشر ملا هبت الله اخندزاده په امر په ټول هېواد کې پلی کیږي، واک ته د بیرته راستنیدو راهیسې د دې ډلې یو له تر ټولو سختو قوانینو څخه ګڼل کیږي.
د طالبانو مشر مخکې اعلان کړی و چې د دې ډلې د شل کلنې جګړې یو له اصلي موخو څخه د همدې قانون تطبیق و. د هغه د حکم له مخې، د دې قانون د پلي کیدو د ډاډ لپاره په ټولو ولایتونو کې د والیانو په مشرۍ منظمې څارونکې غونډې جوړیږي.
دا په داسې حال کې ده چې منتقدین، په ځانګړې توګه د بشري حقونو بنسټونه او د ښځو د حقونو فعالان، وايي چې طالبان دا قانون د اتباعو، په ځانګړې توګه د ښځو د اساسي حقونو د ځپلو لپاره د یوې وسیلې په توګه کاروي. د دوی په وینا، دې قانون له عامه ډګر څخه د ښځو د سیستماتیک ایستلو او د فردي او ټولنیزو آزادیو د محدودولو لامل شوی دی.
سرچینه: Zarin TV
🌐
