په تخار کې د طالبانو د حکومت د کرنې، اوبو لګولو او مالدارۍ ریاست اعلان کړی چې په دغه ولایت کې د شولو حاصلات د تېر کال په پرتله لس سلنه زیات شوي دي. دغه ریاست د شنبې په ورځ، د تلې په ۱۹مه، د یوې ویډیو په خپرولو سره ویلي چې دا زیاتوالی د اوبو د مدیریت د ښه والي او له ځايي بزګرانو څخه د ملاتړ پایله ده.
دا خبر په داسې حال کې خپرېږي چې په وروستیو کلونو کې د تخار او نورو شمالي ولایتونو بزګران د پرله پسې وچکالیو او د اوبو د کمښت له امله له جدي ستونزو سره مخ وو. د رسنیو د راپورونو له مخې، په ځینو سیمو کې د اوبو کمښت حتی د دې لامل شوی و چې د شولو کښت نیمایي ته راټیټ شي او ځینې کرنیزې ځمکې په شاړو ځمکو بدلې شي.
په تخار کې د شولو د حاصلاتو زیاتوالی د دغه ولایت د ځايي اقتصاد او خوراکي امنیت لپاره یو ښه خبر کېدای شي. شولې په تخار کې یو له سترو کرنیزو محصولاتو څخه ګڼل کېږي او د زرګونو کورنیو ژوند د هغې په کرلو او راټولولو پورې تړلی دی.
ځايي چارواکو هیله څرګنده کړې چې د ملاتړیزو پروګرامونو په دوام او د اوبو سرچینو د وضعیت په ښه کېدو سره به په راتلونکو کلونو کې هم په دغه ولایت کې کرنیز تولیدات زیات شي. دوی ټینګار وکړ چې هڅه کوي د نویو اوبولګولو کانالونو په جوړولو او د پخوانیو کانالونو په بیارغونې سره د بزګرانو لپاره د اوبو د کمښت ستونزه په دایمي توګه حل کړي.
په ورته وخت کې، پراخې ننګونې لکه د اقلیم بدلون او دوره یي وچکالۍ لاهم د افغانستان د کرنې سکټور لپاره یو جدي ګواښ دی. کارپوهان په دې باور دي چې د دې ننګونو سره د مقابلې لپاره، د اوبو سرچینو مدیریت او د وچکالۍ په وړاندې مقاومت لرونکو عصري کرنیزو میتودونو ته وده ورکولو په برخه کې لویو پانګونو ته اړتیا ده.
په تخار کې دا حاصلات په داسې حال کې زیات شوي چې افغانستان په ټولیز ډول له خوراکي بحران سره مخ دی او میلیونونه خلک بشري مرستو ته اړتیا لري. د کورنیو تولیداتو ښه والی کولی شي له وارداتو څخه د هیواد د انحصار په کمولو او د ملي اقتصاد په پیاوړتیا کې مرسته وکړي.
سرچینه: د تخار د کرنې ریاست
🌐
