د پاکستان تحریک انصاف (پي ټي آی) ګوند ویلي چې پولیسو نن (دوشنبه) سهار وختي د خیبر پښتونخوا په بېلابېلو سیمو کې د دغه ګوند د غړو پر کورونو چاپې وهلې دي. دا چاپې په داسې حال کې وهل شوي چې د مرکزي حکومت او دغه ګوند ترمنځ سیاسي کړکېچ اوج ته رسېدلی دی.
تحریک انصاف ګوند ادعا کړې چې د پاکستان د مرکزي حکومت لخوا په خیبر پښتونخوا کې د ولسواکۍ له لارې د ټاکل شوي حکومت د لرې کولو او د بېړني حالت د اعلانولو موخه د ترهګرۍ پر وړاندې مبارزه نه، بلکې د عمران خان د ګوند ځپل دي.
د پخواني لومړي وزیر عمران خان په مشرۍ دغه ګوند پر مرکزي حکومت تور لګوي چې هڅه کوي په دغه مهم ایالت کې د دوی د واک مرکزونه کمزوري کړي. خیبر پښتونخوا په دودیز ډول د تحریک انصاف ګوند یو له مهمو مرکزونو څخه ګڼل کیږي.
بلخوا، تېره شپه د پېښور پوهنتون ګڼ شمېر محصلانو د یوه لاریون په ترڅ کې په خیبر پښتونخوا کې د بېړني حالت اعلان غندلی دی. لاریونوالو د والي د واکمنۍ پر ضد شعارونه ورکړل او د ټاکل شوي حکومت د بیا پرځای کېدو غوښتنه یې وکړه.
دا کړکېچ وروسته له هغه زیات شو چې فدرالي حکومت د امنیتي وضعیت د خرابوالي په پلمه د تحریک انصاف په مشرۍ ایالتي حکومت له منځه یووړ او بېړنی حالت یې اعلان کړ. خو تحریک انصاف دا اقدام یوه سیاسي «کودتا» بولي.
سیاسي شنونکي اندېښنه لري چې دا سیاسي بحران کولی شي په دغه ایالت کې، چې له وړاندې له امنیتي او اقتصادي ننګونو سره مخ دی، نوره بې ثباتي هم رامنځته کړي.
سرچینه: Zarin TV
🌐
