بیر ایتالیالیک یاردمچی تشکیلات نینگ اساسچیسی سوزانا فیورتی، فاش قیلدی کیم، طالبان نینگ قدرتگه قیتیب کیلیشی دن کیین، افغانستانده عیال لر اوچون بیر مخفی مکتب قورگن و ایکی ییلدن کیین طالبان اعضاسی نینگ بیر قطار قیزلری نینگ هم اوشبو مکتبده درس اۉقیётگنی نی بیلیب آلگن.
«نووه کرینگ هیومنز» تشکیلات نینگ اساسچیسی بولگن خانم فیورتی، ایتالیا نینگ «کوریره دلا سرا» روزنامه سی بیلن صحبتده ایتدی کیم، بو قیزلرنینگ آته و آنه لری فرزندلری نینگ تحصیل قیلیشینی ایستر ایدیلر. بو موضوع حتی طالبانگه باغلیق عایله لر ارا سیده هم فرقلی فکر لرنینگ بارلیگینی کۉرسه ته دی.
او توضیح بېردی کیم، طالبان حکومتی تامانیدن عیال لرگه عالی تحصیلات نینگ منع قیلینیشی دن کیین، بو مخفی مکتب نی یۉلگه قۉییشگه قرار قیلگن. فیورتی نینگ ایتیشیچه، درس صنف لری تیکووچیلیک ماشین لری هم قۉییلگن بیر اطاقده اۉتکزیلر ایدی. ریجه شو ایدی کیم، اگر طالبان کوچلری تفتیش اوچون کیلسه، کتابچه لر و قلم لر یاشیریلیب، اۉقووچیلر اۉزلرینی تیکووچیلیک بیلن مشغول کۉرسه تیشلری کیره ک ایدی.
فیورتی، بیرینچی ایکی ییلده طالبان کوچلریدن هیچ بیری تفتیش اوچون او یېرگه کیلمگنی نی بیلدیریب، قۉشیمچه قیلدی کیم، بیر مدت دن کیین اۉقووچیلرنینگ بیر قطاری طالبان اعضاسی نینگ قیزلری ایکنینی توشینگن. او بو سوالگه جوابده کیم اولر جاسوس ایدی می، دیدی: «یۉق، طالبان اعضاسی نینگ قیزلری ایدی. آته و آنه لری اولرنینگ درس اۉقیشینی ایستر ایدیلر.»
بو ایتالیالیک یاردمچی نینگ ایشانچیچه، طالبانگه باغلیق برچه کیشی لر بیر خیل فکرده ایمس و بعضی لری مخفی روشده ناتوغری دیب بیله دیگن چیکلاو لرنی اوزگرتیریشگه حرکت قیله دیلر. او شونینگدیک تاکیدله‌دی کیم، بو مخفی مکتب نینگ فعالیتی جدی خطر لر بیلن همراه ایدی و اونینگ امر بالمعروف مامورلریگه گزارش بېریلیشی آغیر عاقبت لرگه سبب بولیب قالیشی ممکن ایدی.
فیورتی شونینگدیک افغانستان عیال لری اوچون اقتصادی فرصت لر یره تیش اوچون قیلگن سعی و حرکت لری حقیده هم گپیردی. او صحبت و مصالحه آرقه لی، عیال تشبثکار لرنی تقدیرلش اوچون بیر برنامه نی یۉلگه قییش اوچون طالبان مقام لری نینگ رضایتی نی قولگه کیریتگن. اونینگ ایتیشیچه، طالبان عیال لرنینگ اقتصادی فعالیتی مملکت اوچون درآمد کیلتیره آلیشی نی توضیح بېرگنیدن کیین، بو برنامه بیلن موافقت قیلدی و طالبان وزیرلریدن بیری نینگ حضوری ده بولیب اوتگن بیر ییغینده غلبه قازانگن عیال لر تقدیرلندی.
منبع: کوریره دلا سرا روزنامه سی
🌐
