بیرلشگن عرب امیرلیک لری نینگ بیرلشگن ملت لر تشکیلاتی باش کاتبی مقامی اوچون کاندیداتی لانا نسیبه، ۲۵ افغان مدنی جمعیت تشکیلاتی و بیر قطار تانیقلی افغان فعال عیال نینگ اۉز کاندیداتوره‌سیدن حمایت قیلگنی اوچون قدردانلیک بیلدیردی. او عیال لرنینگ سسی اېشیتیلیشی و اولرنینگ همه سویه لرده اشتراکی تامین ایتیلیشی کیره کلیگینی تاکیدله‌دی.
خانم نسیبه دوشنبه کونی اکس اجتماعی ترماغی ده افغانستان سابق نماینده لر مجلسی نینگ اعضاسی فوزیه کوفی نینگ حمایتی پیامیدن تشقری، بو حمایتدن «چقور تاثیرلنگنینی» یازدی. او قۉشیمچه قیلدی: «فوزیه کوفی دن اونینگ قیممتلی سوزلری اوچون صمیمانه سپاسگزارمن.»
لانا نسیبه اۉز پیامی ده یازدی: «بو عیال لرنینگ شجاعتی بیرلشگن ملت لر تشکیلاتی کیم لر اوچون خدمت قیلیشگه اساس سالینگنینی ینه بیر بار یادگه ساله‌دی. عیال لرنینگ سسی و حقوق لری حفظ ایتیلیشی کیره ک و اولرنینگ همه قرار چیقاریش ییغین لریده حضوری و اشتراکی تضمین ایتیلیشی کیره ک.» بو پیام اونینگ سییلنگن تقدیرده عیال لر حقوقینی مرکزگه ق۬ییش تعهدینی کۉرسه ته دی.
لانا نسیبه، بیرلشگن عرب امیرلیک لری نینگ تشقی ایشلر وزیرلیگی معاونی و بو مملکت نینگ بیرلشگن ملت لر تشکیلاتی ده گی سابق نماینده سی دیر. امیرلیک لر ۲۹ میزانده اونی رسمی روشده آنتونیو گوترش نینگ اورین باسری صفتیده کاندیدات اعلان قیلدی. او بو یوکسک خلق ارا مقام اوچون بیر نیچه کاندیداتدن بیری دیر.
خانم نسیبه بیرلشگن ملت لر تشکیلاتی ده گی نماینده لیگی دوریده، اینیقسه خوفسیزلیک کېنگه شیده، کوپ مرته طالبان حکومتی نینگ افغان عیال و قیزلریگه قرشی چیکلاووچی سیاست لریدن تنقید قیلگن ایدی. او طالبان دن بو سیاست لرده فوری روشده قیته کۉریب چیقیشنی سوره ب، عیال لرنینگ تعلیم و ایش حقی گه تاکید قیلگن ایدی.
۲۰۲۳ نچی ییل جون آیی ده، بیرلشگن عرب امیرلیک لری خوفسیزلیک کېنگه شی نینگ دوره‌ای ریاستینی اۉز ذمه سیگه آلگن پیتده، خانم نسیبه بیر ییغین نی افغانستان وضعیتی گه بغیشله‌دی. او اوشبو ییغینده تاکیدله‌دی کیم، افغان عیال و قیزلری نینگ همه سویه لرده تعلیم آلیش امکانیتی «مصالحه قیلینمس» دیر و خلق ارا همجمعیت بو چیکلاو لرنی برطرف ایتیش اوچون بیرپارچه شکلده عمل قیلیشی کیره ک.
او شونینگدیک آگاهلنتیرگن ایدی کیم، عیال لرنی اقتصادی، اجتماعی و یاردمچی فعالیت لردن محروم قیلیش، افغانستانده گی بشری بحران نی شدت لنتیره دی و بو مملکتده دواملی رواجلنیشگه توسیق بوله دی.
منبع: اکس اجتماعی ترماغی
🌐
