بغلان ولایتیده طالبان نینگ محلی مسئوللری، شمالی سالنگده بیر ۵۸۰ نوعلی موتر بیلن بیر تانکرنینگ تصادفی عاقبتیده، کمیده بېش کیشی جان بیرگن و باشقه ۲۰ کیشی یره لنگنینی اعلان قیلدیلر. بو، متفاوت آمارلر بیلن بو حادثه حقیده‌گی ایکینچی گزارش دیر.
بغلان ترافیک عمومی مدیری نذیرالله عابدی، بو حادثه بوگون ایرته لب ساعت ۲:۰۰ اطرافیده (جمعه، ۸ عقرب) شمالی سالنگ کیریشیده یوز بیرگنینی ایتدی. او، حادثه‌ده جان بیرگنلر و یره دارلرنینگ شفاخانه‌گه انتقال بیریلگنینی قۉشیمچه لهدی.
بو اۉلیملی تصادف نینگ انیق سببی حقیده تیکشیرولر باشلنگن. شمال ولایتلرینی کابل بیلن باغله یدیگن سالنگ شاهراهی، تاغلیق بولگنلیگی و آغیر واسطه‌لرنینگ ترددی سببلی، هر دایم اۉلیملی ترافیک حادثه لریگه شاهد بولگن.
بوتون افغانستان بوییچه ترافیک حادثه‌لری هر ییلی یوزلرچه کیشی نینگ جانینی آلیب و مینگلرچه کیشینی یره دار و معلول قیلیب قویه‌دی. متخصصلر بو حادثه‌لرنینگ اساسی سببلرینی یوللرنینگ خرابلیگی، تیزلیک، شوفرلرنینگ احتیاطسیزلیگی و ترافیک قانونلریگه رعایت قیلمسلیک دیب بیله‌دیلر.
بو حادثه، طالبان رهبری هبت‌الله آخوندزاده یقین‌ده بیر فرمان آرقهلی تیگیشلی اداره‌لرگه ترافیک حادثه‌لری نینگ عامللرینی قولگه آلیش و شریعتگه موافق جزالنتیریشنی بویورگن بیر پیتده یوز بیرماقده.
بیراق، بو فرمان حادثه‌لرنی کمه‌یتیریشده کوپ تأثیر قیلمه‌گن کۉرینه‌دی، چونکه تقریباً هر کون مملکت نینگ مختلف ولایتلریدن بونده‌ی اۉلیملی حادثه‌لرنینگ یوز بیرگنی حقیده گزارشلر نشر ایتیله‌دی.
منبع: اطلاعات روز
🌐
