قندوز حوزوی شفاخانه‌سی نینگ مسئوللری، بغلان ولایتی نینگ خوست و فرنگ ولسوالیسی‌دن بیر آنه نینگ اوتگن کېچه تۉرت نوزادنی دنیاگه کېلتیرگنینی تصدیقله ماقده. بو نوزادلر اوچ قیز و بیر اۉغیلدن عبارت.
قندوزده طالبان نینگ عامه ساغلیق ریاست سۉزچیسی ولید رحیمی، طلوع نیوزگه آنه و هر تۉرت نوزادنینگ ساغلیق وضعیتی «یخشی» ایکنینی و طبیب‌لر نظارتی آستیده ایکنلیکرینی ایتدی.
افغانستان نینگ ساغلیق سقلش نظامی امکانیت‌لر و متخصص کوچلر یېتیشمس‌لیگی کبی کۉپلب قیینچیلیکلر بیلن یوزمه یوز بۉلگن بیر پیتده، بو نادر واقعه یوز بېرماقده. شونگه قره‌مسدن، بو تۉرت نوزادنینگ موفقیتلی توغیلیشی، طبی پرسونل و محلی خلق اۉرته‌سیده بیر امید اوچقونینی پیدا قیلدی.
اوشبو نوزادلرنینگ آته‌سی شمس الرحمن، فرزندلری نینگ توغیلیشیدن خرسندلیگینی بیلدیریش بیلن بیرگه، اۉزی نینگ اقتصادی وضعیتی‌دن تشویش بیلدیردی. او طالبان حکومتیدن و خیریه تشکیلاتلریدن تۉرت فرزندی نینگ تربیه‌سی و مراقبتی خرجت‌لرینی تأمینلشده اونگه یاردم بېریش‌لرینی سۉره‌دی.
بو یاردم س۸راوی، بوتون افغانستان بۉیلب فقیرلیک و ایشسیزلیک جدی شکلده آشگن و کۉپلب عایله‌لر اۉز اساس احتیاج‌لرینی تأمینلشده جدی قیینچیلیکلرگه دوچ کېلگن بیر شرایطده مطرح بۉلماقده.
طبی جامعه و اجتماعی فعاللر، بو آته نینگ ایسته گیگه جواب بېریلیب، بو تۉرت نوزادنینگ مناسب شرایطده اۉسیشیگه امکانیت یره تیلیشیگه امید باغله ماقده‌لر. بو واقعه افغانستانده محتاج عایله‌لرنی قوللب-قوتلش همده آنه و باله ساغلیق خدمت‌لرینی کوچه‌یتیریش ضرورتی نی ینه بیر بار کورسه تدی.
منبع: طلوع نیوز
🌐
