اوکرایني چارواکو اعلان کړی چې د خارکیف په ښار کې پر یوې څو پوړیزې د استوګنې ودانۍ د روسیې توغندیز برید لږ تر لږه دوه تنه وژلي او ۲۵ نور یې ټپیان کړي دي.
د خارکیف ښاروال وايي، د یوې میرمنې او د هغې د زوی جسدونه له ویجاړیو را ایستل شوي او د ژغورنې عملیات لا هم دوام لري.
له سیمې خپاره شوي انځورونه پراخه ویجاړي او د ژغورنې د ډلو هڅې ښيي. اوکراین وايي چې دوه بالستیک توغندي پر دې سیمه لګیدلي، خو د روسیې دفاع وزارت په دې برید کې لاس لرل رد کړي او ادعا کوي چې چاودنه د اوکراین د خپلو مهماتو له امله شوې ده.
دا برید په داسې حال کې کیږي چې په وروستیو ورځو کې او د نوي زیږدیز کال په ورځو کې د دواړو هیوادونو ترمنځ متقابل بریدونه زور اخیستی دی.
روسیه ادعا کوي چې اوکراین له ملکي سیمو د مهماتو ساتلو لپاره کار اخلي، هغه ادعا چې کییف تل رد کړې ده.
