د چهارشنبې په سهار، د میزان په ۱۵مه، د بدخشان ولایت په مرکز فیض اباد ښار کې د طالبانو د امنیه قومندانۍ سره نږدې په پروژه څلورلارې کې چاودنه وشوه. د راپورونو له مخې، په دې پېښه کې یو هایلکس ډوله موټر په نښه شوی دی.
لږ تر لږه دریو سیمه ییزو سرچینو تایید کړې چې په دې چاودنه کې یو هایلکس موټر په نښه شوی دی. د دغو سرچینو په وینا، له چاودنې وروسته طالب ځواکونو د خلکو د خپرولو او د پېښې ځای ته د هغوی د نږدې کېدو د مخنیوي لپاره هوايي ډزې وکړې.
تر اوسه د دې پېښې د احتمالي مرګ ژوبلې او د چاودنې د دقیق ډول په اړه جزئیات نه دي ورکړل شوي. د طالبانو سیمه ییزو چارواکو هم تر اوسه په دې اړه څه نه دي ویلي او د برید مسوولیت هم کومې ډلې نه دی منلی.
دا چاودنه په داسې حال کې کېږي چې په وروستیو میاشتو کې په بدخشان ولایت کې امنیتي پېښې زیاتې شوې دي. په تېرو څو ورځو کې په فیض اباد ښار کې څو نورې چاودنې هم شوې دي.
د سیمه ییزو سرچینو د معلوماتو له مخې، تېره پنجشنبه هم د فیض اباد په وکیل اباد سیمه کې چاودنه شوې وه. یوې سرچینې هغه مهال ویلي وو چې په هغه برید کې د طالبانو یو رینجر موټر په نښه شوی و.
یوه ویډیو چې له نننۍ پېښې څخه په ټولنیزو رسنیو کې خپره شوې، له چاودنې وروسته د لوګي یوه ستنه ښيي. په بدخشان کې د ناامنیو زیاتوالي د دغه ولایت د اوسېدونکو ترمنځ اندېښنې راپورته کړې دي.
سرچینه: محلي سرچینې
🌐
