د طالبانو د حکومت د اقتصاد وزیر دین محمد حنیف په کابل کې د هند سفارت له چارسمبالي یتین پټېل سره کتلي او د اقتصادي او پراختیایي همکاریو د پراختیا او په افغانستان کې د هند د نیمګړو پروژو د بشپړولو په اړه یې خبرې کړې دي.
د اقتصاد وزارت د خبرپاڼې پر بنسټ، دا لیدنه په کابل کې د اقتصاد وزارت په مقر کې ترسره شوې او دواړو لورو پر دوه اړخیزو اړیکو پر پیاوړتیا ټینګار کړی. سرچینې زیاته کړې چې ښاغلي حنیف له افغانستان سره د هند د مرستو ستاینه کړې او د هغو پروژو د بیا پیل او بشپړولو غوښتنه یې کړې چې پخوا د هند له خوا تمویلېدې.
بل لور ته، ښاغلي پټېل له افغانانو سره د خپل هېواد د مرستو د دوام ډاډ ورکړی دی. هغه زیاته کړې چې د نیمګړو پروژو د بشپړولو او د بشپړو شویو پروژو د لګښتونو د لېږد په اړه یې له اړوندو هندي ادارو سره همغږي کړې ده.
دا خبرې په داسې حال کې کېږي چې د افغانستان د پخواني حکومت له نسکورېدو وروسته، ډېرې پراختیایي پروژې چې د مرستندویه هېوادونو له خوا تمویلېدې، ودرېدې. هند په تېرو دوو لسیزو کې له افغانستان سره یو له سترو سیمه ییزو مرستندویانو څخه و، چې د زیربنا، روغتیا او پوهنې په برخو کې یې ګڼې پروژې پلې کړې دي.
د دې پروژو بشپړول کولی شي د افغانستان پر اقتصاد مثبت اغېز ولري او د کار نوي فرصتونه رامنځته کړي. د طالبانو حکومت هڅه کوي چې د نړیوالو همکاریو په جلبولو سره، درېدلې پروژې بېرته فعالې کړي.
دواړو لورو موافقه وکړه چې د پروژو د بیا پیلولو لپاره د عملي لارو موندلو په موخه به خپلو تماسونو ته دوام ورکړي.
سرچینه: د اقتصاد وزارت خبرپاڼه
🌐
