د امریکا د بهرنیو چارو وزارت د ۲۰۲۶ کال د بشري قاچاق په کلني راپور کې ویلي چې په افغانستان کې طالبان او "نورې وسلهوالې ډلې"، د داعش خراسان څانګې او د ملي مقاومت جبهې په ګډون، په غیرقانوني توګه ماشومان د جنګي او ملاتړیزو رولونو لپاره استخداموي او کاروي. دغه راپور افغانستان په "دریمه درجه" کې ساتلی، چې دا په ډاګه کوي چې دغه هېواد د بشري قاچاق د له منځه وړلو لپاره لږ تر لږه معیارونه نه پوره کوي.
د راپور له مخې، له ماشومانو څخه د چاودېدونکو توکو د ځای پر ځای کولو او چاودولو، د وسلو لېږدولو، جاسوسۍ او د اډو د ساتنې لپاره کار اخیستل کېږي. د امریکا د بهرنیو چارو وزارت وايي، طالبان ماشومان په زور او فریب سره د افغانستان او پاکستان له ښوونځیو څخه جذبوي او په هغو جهادي مدرسو کې یې شاملوي چې پوځي روزنه ورکوي.
په راپور کې "بچه
بازۍ" ته هم اشاره شوې او ویل شوي چې دا عمل لا هم د اندېښنې وړ دی او په ځینو مواردو کې د طالبانو غړي د دې کار عاملین دي. قربانیان معمولاً له ۱۰ تر ۱۸ کلونو عمر لرونکي هلکان دي چې یا تښتول شوي یا د بېوزلو کورنیو لخوا پلورل شوي دي.
که څه هم طالبانو له خپلو لیکو څخه د ماشومانو د پېژندلو او ایستلو لپاره یو کمیسیون جوړ کړی او یوې نړیوالې موسسې د ۵۸ ماشومانو په خوشې کولو بریالۍ شوې، خو د امریکا راپور ټینګار کوي چې طالبانو د ماشومانو د استخدام د مخنیوي لپاره اغېزمن ګامونه نه دي پورته کړي.
راپور همدارنګه د طالبانو د بشري قاچاق ضد نوي قانون ته هم کتنه کړې چې د جنورۍ په میاشت کې معرفي شو. د امریکا د بهرنیو چارو وزارت وايي، په دې قانون کې د بشري قاچاق روښانه تعریف نشته او ټاکل شوې سزاګانې یې هم کافي سختې نه دي. حقوقي کارپوهانو هم د مبهمو تعریفونو او په جبري اعترافونو د تکیې په اړه اندېښنه ښودلې ده.
د تګ راتګ، زده کړې او کار په برخه کې د طالبانو د محدودیتونو له امله د ښځو او نجونو زیانمنېدنه د پام وړ زیاته شوې ده. راپور زیاتوي چې له ایران او پاکستان څخه راستانه شوي کسان او همدارنګه قومي او مذهبي لږکي لکه هزاره
ګان هم په زیاتیدونکي ډول د استثمار له خطر سره مخ دي.
په پای کې، د امریکا بهرنیو چارو وزارت روښانه کړې چې په دې راپور کې د "طالبان" اصطلاح کارول د امریکا له خوا د افغانستان د حکومت په توګه د هغوی د په رسمیت پېژندلو په مانا نه ده.
سرچینه: د امریکا بهرنیو چارو وزارت ۲۰۲۶ کال راپور
🌐
