د خيبر پښتونخوا والي، فيصل کريم کنډي، په يوه خبري غونډه کې د پاکستان تحريک انصاف ګوند (پي ټي ای) او د پښتونخوا پر لومړي وزير سهيل اپريدي سختې نيوکې وکړې. نوموړي له دغه ګوند څخه وپوښتل چې ولې د افغان طالبانو، ټي ټي پي او د «فتنة الخوارج» په نوم د هغو وسلهوالو ډلو پر ضد چې د ده په وينا پوځ او پښتانه وژني، نېغ په نېغه دريځ نه نيسي او يا هم يو روښانه رسمي بيان نه خپروي.
ښاغلي کنډي په خپلو څرګندونو کې ټينګار وکړ چې دغه ډلې د پوځ او پښتنو د وژلو مسؤلې دي. هغه پر پي ټي ای تور پورې کړ چې د وسلهوالو او ترهګرو ملاتړی دی او هېڅکله د ترهګرۍ پر ضد درېدلی نشي. د هغه په وينا، د وسله والو ډلو د تاوتريخوالي ډکو کړنو په وړاندې د دغه ګوند چوپتيا، له ترهګرو سره د دوی نرمښت او خواخوږي په ډاګه کوي.
د پښتونخوا والي د پي ټي ای پر مشرانو غږ وکړ او ويې ننګول چې که پر خپل ځان باور لري او په خپلو خبرو کې بې باکه او زړور وي، نو بايد سمدلاسه د پاکستان د امنيتي ځواکونو او پوځ تر څنګ ودرېږي. هغه زياته کړه چې پر پي ټي ای او د هغوی پر ولايتي حکومت د وېرې خولې ناستې دي، او له همدې امله د وسله والو ډلو پر ضد د دريځ نيولو جرئت نه لري.
دا توندې څرګندونې په داسې حال کې کېږي چې د خيبر پښتونخوا لومړی وزير سهيل اپريدی، چې د تحريک انصاف يو لوړپوړی غړی دی، همدا اوس په پېښور کې د خپل بندي مشر عمران خان د خلاصون لپاره لاريونونه کوي. کنډي په ځانګړې توګه اپريدي ته په خطاب کې وويل چې په پي ټي ای او د هغوی په مسؤلينو کې تر اوسه دا زړورتيا او همت نه دی پيدا شوی چې د افغانستان يا د ټي ټي پي د وسلهوالو کړنو پر ضد غږ پورته کړي.
د فدرالي حکومت له خوا د ټاکل شوي والي او د پي ټي ای تر کنټرول لاندې د ايالتي حکومت ترمنځ دا سياسي کړکېچ په داسې وخت کې زياتيږي چې پاکستان د وسله والو ډلو له لوري، په ځانګړې توګه له افغانستان سره په پوله پرتو سيمو کې، له زياتېدونکو امنيتي ننګونو سره مخ دی.
سرچینه: د پښتونخوا والي فیصل کریم کنډي په د.txt
🌐
