د امریکا د هوايي چلند فدرالي ادارې اعلان وکړ چې په ټول هېواد کې د الوتکو د درېدو امر له څلورو ساعتونو وروسته لغوه شوی دی. د دغه امر لغوه کول الوتکو ته د الوتنې اجازه ورکوي، خو په دې مانا نه ده چې ټولې الوتنې به سمدستي عادي حالت ته راوګرځي.
د امریکا د ترانسپورت وزیر شان دافي خبرداری ورکړی چې د جمعې ورځې د پېښو وروسته به د عادي حالت راتګ وخت ونیسي. نوموړي څرګنده کړه چې لسګونه زره مسافر بند پاتې دي او ښايي ډېر کسان شپه په هوايي ډګرونو کې تېره کړي.
د امریکا د ترانسپورت وزیر په وینا، د هوايي ترافیک د کنترول یو زوړ سیسټم د ډېرو معلوماتو له امله له ستونزې سره مخ شو او ناسم ارقام یې استول. هغه له کانګرس څخه وغوښتل چې د دغه سیسټم د نوي کولو لپاره لازمې پیسې منظورې کړي.
د فاکسنیوز د راپور له مخې او د فلایټاوېیر وېبپاڼې د شمېرو پر بنسټ، په امریکا کې یا دې هېواد ته له ۴۴۰۰ ډېرې الوتنې لغوه شوې او څه باندې ۱۰ زره نورې له ځنډ سره مخ شوې دي. په نړیواله کچه هم د څه باندې ۵۱۰۰ الوتنو لغوه کېدل ثبت شوي دي.
د امریکا ولسمشر ډونالډ ټرمپ وویل داسې نښې نشته چې ګواکې دا ستونزه د سایبري برید له امله رامنځته شوې وي، بلکې لامل یې زاړه تجهیزات دي. د کورني امنیت وزیر مارکوین مولین هم هر ډول سایبري برید یا له مایکروسافټ سره د دې ستونزې تړاو رد کړ.
په امریکا کې د الوتنو دا ډول سراسري درېدل ډېر کم مخینه لري او تر دې مخکې یوازې د ۲۰۰۱ کال د سپټمبر پر ۱۱مه او د ۲۰۲۳ کال د جنورۍ پر ۱۱مه رامنځته شوي وو.
سرچینه: فاکسنیوز
🌐
