افغانستان نینگ سابق جمهور رئیسی حامد کرزی، پاکستان نینگ اخیرگی کونلرده کنر و هلمند ولایتلریگه قیلگن هوا هجوملرینی قتتیق قاره له دی. او بو حرکت نی افغانستان حریمینی بوزیش و ملی حاکمیتینی آچیقچه پایمال قیلیش دېب اته دی و اسلام آباد دن خصمانه سیاستلر آلیب باریش اۉرنیگه، افغانستان بیلن یخشی قۉشنیچیلیک و مدنی مناسبتلر اساسیده تعامل قیلیشنی سۉره دی.
جناب کرزی اۉز اجتماعی ترماقلریده بیر پیام ترقه تیب، پاکستان اردوسی هجوملری قربانلری نینگ عایله لریگه چوقور همدردلیک بیلدیرر ایکن، بو واقعه نی اینگ کېسکین سۉزلر بیلن قاره له دی. او بونده ی ایشلر فقط ایکی قۉشنی مملکت اورته سیده گی کېسکینلیک و ایشانچسیزلیکنی آشیریشینی و موجود معمالرنینگ ییچیمی اېمسلیگینی تاکیدله دی.
افغانستان نینگ سابق جمهور رئیسی اۉز پیامی ده پاکستان رهبرلریگه خطاب قیلیب، «بهانه قیلیش، افغان عیاللری و باله لرینی اۉلدیریش، و اوروشخۉرلیک سیاستلری» اۉرنیگه، اۉزلری نینگ خصمانه ریجه لرینی قیته کۉриб چیقیشلری کېره لیگینی ایتدی. او پاکستاندن معمالرنینگ ایلدیزلرینی اۉز ایچیده قیلیشنی و باشقه لرنی عیبلاشدن تېیلیشنی طلب قیلدی.
_بو عکس العمل، طالبان حکومتی پاکستان نینگ اهالی یشه یدیگن منطقه لرگه هوا هجوملریده، عیاللر و باله لرنی هم اۉز ایچیگه آلگن ۹ تینچ اهالی نینگ هلاک بولگنی و ۱۱ کیشی نینگ یره لنگنینی تاییدله گن بیر پیتده یوز بېرماقده. جناب کرزی هم بو تلفاتلرگه اشاره قیلیب، اولرنی تکان بېرووچی و قبول قیلیب بولمه یدیگن دېب اته دی.
پاکستان نینگ هجوملری، که اسلام آباد نینگ ایتیشیچه تروریستلرنینگ پناهگاه لریگه قرشی عملگه آشیریلگن، افغانستان ایچیده کینگ کولمده قاره لشلر بیلن روپه ره بولگن. کۉپلب سیاسی چهره لر و مملکت یشاوچیلری بو هجوملرنی افغانستان گه قره ته پاکستان نینگ ایکی یوزلمه سیاستیدن نشانه دېب بیله دیلر.
حامد کرزی هر دایم پاکستان بیلن دوستانه و اۉز ارا حرمتگه اساسلنگن مناسبتلر ضرورلیگینی تاکیدلب کیلگن. اونینگ ایشانچیچه، افغانستان و پاکستانده گی ثبات و خوفسیزلیک بیر بیریگه باغلیق و فقط صادقانه همکارلیک آرقه لی تروریزم کبی مشترک قیینچیلیکلرنی ینگیش ممکن.
منبع: اجتماعی رسانه لر
🌐
