پشتون حفاظت حرکتی نینگ رهبری منظور پشتین، "هاگ دیالوگی" ییغیلیشیده گی چیقیشیده، پاکستان اردوسی و مملکت نینگ استخباراتی اداره لرینی قوراللی گروه لرنی تشکیل بیریش، مالیه لشتیریش و اۉقیتیشده عیبله‌دی. او بو حرکت لرنینگ منطقه ده بې ثباتلیککه سبب بۉلگه نینی ایتدی.
جناب پشتین بو ییغیلیشده خیبر پختونخوا ایالتیده حربی عملیاتلر، هدفلی اۉلدیریشلر، مجبوراً یۉق بۉلیشلر و اهالی نینگ کۉچیریلیشی هلی هم دوام ایتیاتگه نینی بیلدیردی. او تروریزمگه قرشی عملیاتلر بهانه‌سیده محلی اهالی اۉز اوی لرینی ترک ایتیشگه مجبورلنه یاتگه نینی و بو آرقه لی طبیعی منبع لرگه بای منطقه لرنینگ کنترولی قولگه کیریتیلیاتگه نینی ادعا قیلدی.
پشتون حفاظت حرکتی نینگ رهبری خلق ارا همجمعیت، بیرلشگن ملت لر تشکیلاتی نینگ انسانی حق لر بۉйиچه اداره لری، خلق ارا جنایی محکمه و اروپا اتفاقیدن پختونخوا وضعیتی بۉییچه تیزلیکده تیکشیریشلر آلیب باریشلرینی سۉره‌دی. او منطقه ده گی وضعیت نینگ انسانی بیر بحرانگه ایلنگنینی و خلق ارا همجمعیت نینگ فوری دقتینی طلب قیلیشینی تاکیدله‌دی.
منظور پشتین نینگ سۉزلری جریانیده، پاکستان نماینده لری آصف درانی و محمد جنید، اونینگ سۉزلریگه اعتراض قیلیب ییغیلیشنی ترک ایتدیلر. بو حرکت، پشتون لرنینگ حق لرینی هیمایه قیلووچی فعاللر و پاکستان دولتی اورته سیده گی چوقور تنش لرنینگ بیر کورینیشی دیر.
پشتون حفاظت حرکتی، پاکستان ده گی پشتون اهالیسی نینگ حق لری و خوفسیزلیگی اوچون کوره شووچی بیر اجتماعی حرکت دیر. بو حرکت کۉپ مرته پاکستان اردوسینی پشتون لر یشه یدیگن منطقه لرده انسانی حق لرنینگ کینگ کۉلمده بوزیلیشیده عیبله‌گن، بو عیبلاو لر اسلام آباد تامانیدن هر دایم رد ایتیلگن.
منبع: Zarin TV
🌐
