افغانستان سابق پارلمانی نینگ نماینده سی و طالبانگه یقین سیما لردن بیری بولمیش جعفر مهدوی، کابلده گی بیر مراسمده قیزلر تعلیمی ضرورتی و مملکت رواجلنیشی ده عیال لرنینگ اشتراکی گه تاکیدله دی. او ایتدی کیم، عیال لرنینگ حضوری سیز، افغانستان دواملی رواجلنیشگه ایریشه آلمه‌یدی.
جناب مهدوی نینگ مطبوعاتی دفتری دوشنبه کونی، ۴ عقرب ده، بیر خبرنامه نشر ایتیب اعلان قیلدی کیم، او کابلده گی بیر تعلیمی مرکز فارغ لری نی نیشانلش مراسمی ده نطق قیلگن. مهدوی بو مراسمده قیزلرنی مملکت انسانی ظرفیتی نینگ یریمی دیب اته ب، ایتدی کیم حقیقی استقلال و رواجلنیش، عیال لر و ایرکک لر مملکت ترقیاتی روندی ده فعال رول اۉینه‌گن زمانده ممکن بوله دی.
جعفر مهدوی ۱۴۰۰ نچی ییل اسد آیی ده طالبان نینگ قدرتگه قیتیب کیلیشی دن کیین، بو گروه بیلن تعامل نینگ حمایه‌چی سیاسی شخصیت لریدن بیریگه ایلندی. او کوپ مرته طالبان بیلن صحبت یانداشوویدن مدافعه قیلیب، بو گروه گه قرشی تحریم و فشارلرگه مخالفت قیلگن.
مهدوی ایشانه دی کیم، قیزلرگه مکتب لر و دانشگاه لرنینگ قیته آچیلیشی کبی مسئله لر، تشقی فشار یۉلی بیلن ایمس، بلکه طالبان رهبرلری بیلن صحبت یۉلی بیلن حل ایتیلیشی کیره ک. او شونینگدیک مملکتدن تشقریده گی سیاسی ییغین لرده سیاسی مخالف لرنینگ افغانستانگه قیتیب کیلیشی اوچون زمینه یره تیلیشی گه تاکیدله‌گن.
اونینگ بو سوزلری شونده ی بیر حالده بیان ایتیلماقده کیم، طالبان حکومتی قدرتگه قیتیب کیلگنیدن کیین، میلیونلب قیز و عیال نینگ یوزیگه اورته مکتب لر و دانشگاه لر دروازه سینی یاپیب، اولرنینگ ایش و اجتماعی فعالیت لریگه کینگ چیکلاو لر قۉیگن.
طالبان اوتگن بیر عصرده افغانستان اوزرده گی یکه و یگانه حاکم جریان دیر کیم قیزلرنینگ رسمی تعلیمی نی کینگ کولمده منع قیلگن. بو سیاست هیچ بیر باشقه اسلامی مملکتده سابقه سی یۉق. حتی سعودی عربستان کبی محافظه کار مملکت لر هم سونگگی ییللرده جامعه ده عیال لرنینگ اشتراکینی آشیریش اوچون کینگ اصلاحات لرنی قولگه آلگن. مثال اوچون، سعودی عربستان ایش بازاری ده عیال لرنینگ اشتراکی میزانی ۲۰۱۷ نچی ییلده گی تقریباً ۱۸ فایزدن ۲۰۲۴ نچی ییلده تقریباً ۳۶ فایزگه یوکسلگن.
منبع: جعفر مهدوی نینگ مطبوعاتی دفتری
🌐
