د طالبانو د حکومت د طبیعي پیښو پر وړاندې د مبارزې ملي ادارې خبر ورکړی دی چې د روان لمریز کال له پیل راهیسې په هیواد کې پنځه اویا کسان په اوبو کې ډوب شوي او درې نور ټپیان دي. په قربانیانو کې اوه ویشت نارینه، اوه ښځې او یو څلویښت ماشومان شامل دي.
چارواکو له خلکو غوښتي دي چې د دوبي په موسم کې او د سیندونو د اوبو د کچې لوړیدو پر مهال دې د خوندیتوب اصول په پام کې ونیسي. د اورښتونو او سیلابونو له زیاتیدو سره په بیلابیلو ولایتونو کې د ډوبیدو پیښې زیاتې شوي او خلک باید له خطرناکو سیمو څخه لیرې پاتې شي.
یوازې په تیره یوه اونۍ کې په ننګرهار، پنجشیر او خوست ولایتونو کې د ډوبیدو څو پیښې ثبت شوي دي. د ژغورنې د امکاناتو نشتوالی، د عامه پوهاوي کمښت او سیندونو ته څیرمه د ماشومانو ډیر تګ هغه اصلي لاملونه دي چې هر کال په هیواد کې د ډوبیدو له امله د مرګ ژوبلې کچه لوړوي.
#افغانستان #پیښې #ډوبیدل
🌐
